Dopty hokkeıden ÁCh: Reseı quramasy jeńimpaz atandy
ASTANA. QazAqparat - Shvetsııanyń Venersborg qalasynda dopty hokkeıden márege jetken álem chempıonatynda Reseı men Shvetsııa quramalary fınalda kezdesti, dep habarlaıdy QazAqparat tilshisi.
Álemniń eń tańdaýly komandalary altyn júldeni sarapqa salǵan match asa tartysty ótti.
Kezdesý barysynda reseılikter 2:4. 3:5 esebimen utylyp jatty. Mine, osyndaı sátterde Reseı quramasy sheberlik tanytyp, eki márte buryshtamadan berilgen dopty golǵa aınaldyra aldy. Sóıtip báseke aıaqtalýǵa sanaýly mınýttar qalǵanda, esepti teńestirip ketti.
Qosymsha ýaqytta Almaz Mırgazov jeńis golyn soqty - 6:5. Bul onyń fınaldyq kezdesýdegi úshinshi doby edi.
Osylaısha reseılikter chempıon atanyp, shvedter kúmis júldeni qanaǵat tutty.
Kelesi jyly dúnıejúzilik doda Reseıdiń Irkýtsk qalasynda ótedi.
Eske sala keteıik, budan buryn qazaqstandyqtardyń qola júlde úshin básekede fınderge ese jiberip, tórtinshi orynǵa taban tiregenin jazǵan bolatynbyz.
