Dopty hokkeıden ÁCh: Qazaqstan pleı-offta Norvegııa quramasymen kezdesedi
ASTANA. QazAqparat - Shvetsııanyń Venersborg qalasynda dopty hokkeıden ótip jatqan álem chempıonatynda Qazaqstan quramasy aıdyn ıelerimen kezdesti, dep habarlaıdy QazAqparat tilshisi.
Bul qazaqstandyqtardyń úshinshi oıyny edi. Osyǵan deıin fınderden 0:9, reseılikterden 1:22 esebimen utylǵan Qazaqstan quramasy shvedterge de qarsy tura almady.
Dúnıejúzilik doda ótip kele jatqannan beri álemniń 12 dúrkin chempıony bolyp úlgergen Shvetsııa quramasy qazaqstandyqtardy 22:1 esebimen qınalmaı jeńdi.
Osylaısha A tobynda barlyq qarsylastaryn utqan shvedter birinshi orynǵa ıe boldy. Keshe fınderdi asa tartysty matchta 3:2 esebimen jeńgen Reseı quramasy ekinshi orynda. Bul qos qurama jartylaı fınalǵa birden joldama aldy.
Qazaqstan quramasy jartylaı fınalǵa shyǵý úshin V tobynda birinshi oryn alǵan Norvegııamen kúsh synasady. Al Fınlıandııanyń bendı sheberleri AQSh-pen taǵy bir joldamany sarapqa salady.
Buǵan deıin álem chempıonatynyń alty márte qola júldegeri atanǵan Qazaqstan quramasy bıyl negizinen «Aqjaıyq» komandasynyń oıynshylaryna senim artty. Burynǵydaı legıonerler joqqa jaqyn. Reseıdiń sýperlıgasynda oınaıtyn úsh-aq hokkeıshi bar. Onyń biri - Oral dopty hokkeıiniń túlegi, qurama kapıtany Raýan Isalıev. Qazaqstan quramasynyń bas bapkeri, reseılik maman Sergeı Infalınniń sózine qaraǵanda, qazaqstandyqtar qarsylastarynan oısyraı jeńilip jatqanyna qaramastan, birte-birte tájirıbe jınaqtaýda. Olardyń arasynda jastar da az emes. Qazirgi kezde bolashaqty eskere otyryp, komanda jasaqtaý mańyzdy bolyp otyr.
Shvetsııadaǵy álem chempıonaty 2 aqpan kúni márege jetedi. Aldaǵy jyly dúnıejúzilik dodany Reseıdiń Irkýtsk qalasy qabyldaıdy. Al jastar arasyndaǵy 2020 jylǵy álem chempıonaty Qazaqstanda ótedi. Buǵan deıin 1998 jyly Oral qalasynda jasóspirimder arasynda álem birinshiligi bolǵan edi.
Eske sala keteıik, budan buryn qazaqstandyqtardyń reseılikterden iri eseppen utylǵanyn jazǵan bolatynbyz.
