Dopty hokkeıden ÁCh: Qazaqstan Norvegııany utyp, jartylaı fınalǵa shyqty
ORAL. QazAqparat - Shvetsııanyń Venersborg qalasynda dopty hokkeıden ótip jatqan álem chempıonatynda Qazaqstan quramasy shırek fınalda Norvegııamen kúsh synasty, dep habarlaıdy QazAqparat tilshisi.
Jartylaı fınal joldamasy sarapqa salynǵan match birshama tartysty ótti.
Birinshi taımda aldymen norvegterden Felıks Kallander esep ashty. Sodan keıin Qazaqstan quramasynyń kapıtany Raýan Isalıev tarazy basyn teńestirdi.
Ekinshi taımda mergendik kórsetken R.Isalıev qazaqstandyqtardy alǵa shyǵardy. Sosyn Evgenıı Shadrın men Eskendir Nuǵmanov bir-bir goldan soǵyp, esepti 4:1-ge jetkizdi.
Osylaısha reseılik maman Sergeı Infalın jattyqtyratyn qazaqstandyqtar jartylaı fınalǵa shyqty. Endi olar júldeli oryndar úshin talasatyn bolady. Eń bastysy, bul - Qazaqstan quramasy kúshtilerdiń «A» tobynda qalady degen sóz. Onyń ústine bıyl qazaqstandyqtar álem chempıonatyna alǵash ret negizinen «Aqjaıyq» oıynshylarymen barǵan edi. 1 aqpan kúni qazaqstandyqtar jartylaı fınalda Shvetsııamen sheberlik baıqasady. Buǵan deıin olar shvedterge 1:22 esebimen utylyp qalǵan bolatyn.
Shvetsııadaǵy álem chempıonaty 2 aqpan kúni márege jetedi.
Eske sala keteıik, budan buryn qazaqstandyqtardyń norvegtermen kezdesetinin jazǵan bolatynbyz.
