Dopty hokkeıden ÁCh: Qazaqstan quramasy tórtinshi orynǵa taban tiredi
ASTANA. QazAqparat - Shvetsııanyń Venersborg qalasynda dopty hokkeıden álem chempıonatynda Qazaqstan quramasy qola júlde úshin básekede fındermen kúsh synasty, dep habarlaıdy QazAqparat tilshisi.
Bıyl osymen 39-y ret uıymdastyrylyp otyrǵan dúnıejúzilik dodada qola medaldi kóbinese fınder men qazaqstandyqtar sarapqa salatyn.
Buǵan deıin Fınlıandııa quramasy bir-aq ret álem chempıony atanyp, eki dúrkin kúmis, 21 márte qola júldege ıe bolǵan edi. Qazaqstandyqtar tek alty ret qola júldeni enshilegen bolatyn.
Osy chempıonatta «A» tobyndaǵy alǵashqy básekede fınder Qazaqstan quramasyn 9:0 esebimen tize búktirgen edi. Bul joly da match fınderdiń basymdylyǵymen ótti. Birinshi taımda olar 3:0 esebimen alda tursa, qorytyndyda 8:2-ge jetkizdi.Qazaqstan quramasynan komanda kapıtany Raýan Isalıev qos goldyń avtory atandy. Reseıdiń sýperlıgasyndaǵy «Sıbselmash» (Novosibir) komandasynda óner kórsetetin Raýan osy birinshiliktegi soqqan gol sanyn 4-ke jetkizdi. Ol shırek fınalda Norvegııa qaqpasyna eki ret dop engizip, komandanyń 4:1 esebimen jeńýine súbeli úlesin qosqan-dy. Bul Qazaqstannyń birinshiliktegi bir-aq utysy edi, qalǵan matchtarynda Shvetsııa, Reseı jáne Fınlıandııa quramalaryna iri eseppen ese jiberdi.
Osylaısha reseılik maman Sergeı Infalın jattyqtyratyn qazaqstandyqtar álem chempıonatynda tórtinshi orynǵa tabantirep, kúshtilerdiń «A» tobynda qaldy. Bul jaman nátıje emes. Óıtkeni Qazaqstan alǵash ret álemdik dodaǵa negizinen «Aqjaıyq» hokkeıshilerimen bardy. Burynǵysha reseılik legıonerlerge senim artqan joq. Endi batysqazaqstandyq bendı sheberleri aldynda taǵy bir iri jarys tur. Ol - aldaǵy naýryz aıynda Reseıdiń Krasnoıarsk qalasynda ótetin dúnıejúzilik ýnıversıada. Onda aıdyn ıeleri basty favorıt bolsa, qalǵan júldeli oryndarǵa Qazaqstannyń talasatyny anyq.
Eske sala keteıik,budan buryn qazaqstandyqtardyń Norvegııany utyp, jartylaı fınalǵa shyqqanyn jáne qola júlde úshin básekede fındermen kezdesetinin jazǵan bolatynbyz.
