Dopty hokkeıden ÁCh: Qazaqstan quramasy tórtinshi oryndy qanaǵat tutty
ASTANA. QazAqparat - Búgin Ýlıanovsk qalasynda dopty hokkeıden HHHVІ álem chempıonatynyń qola júlde úshin básekesinde Qazaqstan quramasy shvedtermen aıdynǵa shyqty.
Negizi álemdegi eki myqty komanda Reseı men Shvetsııa bolyp esepteledi. KSRO quramasyn esepke almaǵanda, reseılikter toǵyz ret álem chempıony atansa, odan keıin bul jóninen shvedter basqa eshkimge des bermeı keledi. 1957 jyldan beri dúnıejúzilik dodaǵa qatysyp kele jatqan Shvetsııa óz tarıhynda úshinshi orynnan tómendep kórgen emes.
Alaıda toptyq básekede fın quramasyn (9:1), qazaqstandyqtardy (11:4), reseılikterdi (6:3), sodan keıin shırek fınalda Latvııany 28:3 esebimen utqan Shvetsııa jartylaı fınalda bilgeninen jańylyp, kútpegen jerden jeńilip qaldy. Shvedterdiń oıyn taktıkasyn ábden zerttegen fınder asa tartysty oıynda 3:2 esebimen utyp, fınalǵa joldama aldy. Fınder de - álemdik synda chempıon atanyp kórgen komanda. Al reseılikter jartylaı fınalda Qazaqstan quramasyn 16:6 esebimen oısyrata jeńip, fınderdiń qarsylasy atandy.
Osylaısha, qola júlde úshin kezdesýde Alekseı Nıkıshovtyń shákirtteri álemdegi úzdik komandanyń birimen baq synaýǵa májbúr boldy. Oıyn basynda buryshtamadan keıin shvedter esep ashty. Budan keıin qos komandanyń da gol soǵatyndaı múmkindikteri bolǵanymen, birinshi taımda esep ózgergen joq. Ásirese, taım sońynda Sergeı Pochkýnovtyń 12 metrlik aıyp dobyn engize almaýy qazaqstandyqtardyń tarazy basyn teńestirýine jol bermedi. Ekinshi taımda shvedter esepti 4:0-ge jetkizdi. Qazaqstandyqtar qarymta qaıtarmaq túgili, bir gol soǵa almaı, pushaıman boldy. Match barysynda Qazaqstan quramasynyń qaqpashysy Andreı Reın óz qaqpasyn janyn salyp, qorǵaǵanymen, shvedterdiń dál soqqylaryn únemi toıtarý múmkin emes-ti. Sóıtip qazaqstandyqtar tórtinshi orynnan asa alǵan joq.
Eske sala keteıik, Qazaqstan quramasy buǵan deıin álem chempıonatynyń alty márte qola júldegeri atanǵan edi. Olardyń bárinde de qazaqstandyqtar fınderdi utqan edi. Qazirgi kezde Qazaqstan quramasynda negizinen jasy kelgen hokkeıshiler oınaıdy. Mysaly, Sergeı Pochkýnov oıyndy múldem qoıyp ketse de, bapkerlerdiń ótinishimen qaıta oralýǵa májbúr boldy. Al jartylaı qorǵaýshy Leonıd Bedarev 36-da, taǵy bir jartylaı qorǵaýshy Andreı Kovalev pen shabýylshy Vıacheslav Bronnıkovtyń jasy 35-te. Lek-legimen qosylyp jatqan jastar bolmaǵannan keıin únemi ardagerlerge arqa súıeýdiń aqtamaıtyny anyq.
Qazaqstanda dopty hokkeı kúni búgin Oralda ǵana jaqsy damyǵan dep aıtýǵa bolady. Bıyl qurylǵanyna 40 jyl tolatyn Oraldyń «Aqjaıyǵy» ózimizde chempıonat ótkizilmeıtindikten, «Joǵary lıga» búkilreseılik jarysynyń ekinshi tobynda oınap júr. Osy joly álem birinshiliginde Oral dopty hokkeıiniń túlekteri, komanda kapıtany Raýan Isalıev, sondaı-aq Leonıd Bedarev, Denıs Maksımenko, qaqpashy Іlııas Haırekeshev óner kórsetti. Qazaqstannyń ózinde birinshilik uıymdastyryp, qalalarda komandalar jasaqtamaı, dopty hokkeı alǵa basady dep aıtý qıyn.
