Dopty hokkeıden ÁCh: Qazaqstan quramasy reseılikterge iri eseppen ese jiberdi
ORAL. QazAqparat - Shvetsııanyń Venersborg qalasynda dopty hokkeıden ótip jatqan álem chempıonatynda Qazaqstan quramasy kezekti oıynyn reseıliktermen ótkizdi, dep habarlaıdy QazAqparat tilshisi.
Keńes Odaǵy quramasynyń jeńisterin qosa eseptegende, buǵan deıin 25 márte álem chempıony atanǵan reseılikterdiń osy oıynnyń favorıti ekendigi aıdaı anyq-ty.
Burynǵydaı reseılik legıonerlerge ıek artpaı, negizinen «Aqjaıyq» hokkeıshilerinen quralǵan qazaqstandyqtardyń bıyl júldeli oryndar úshin talasa almaıtyny belgili edi.
Reseılik bendı sheberleri birden oıynyn tizginin qolǵa alyp, 3:0 esebimen alǵa shyqty. Osydan keıin Artem Vshıvkov Qazaqstan quramasynyń chempıonattaǵy alǵashqy golyn soqty. Biraq budan eshteńe ózgere qoıǵan joq. Reseılikter birinshi taımnyń ózinde esepti 9:1-ge jetkizdi.
Ekinshi taımda qarqynyn eseleı túsken reseılikter 22:1 esebimen jeńiske jetti.
Endi Qazaqstan quramasy 30 qańtarda aıdyn ıeleri, álemniń 12 dúrkin jeńimpazy Shvetsııamen kezdesedi. Sodan keıin pleı-off básekeleri bastalady.
Dúnıejúzilik doda 2 aqpan kúni márege jetedi.
Eske sala keteıik, budan buryn Qazaqstan quramasynyń alǵashqy kezdesýinde fınderden utylyp qalǵanyn jazǵan bolatynbyz.
