Dopty hokkeıden ÁCh: Qazaqstan quramasy qola júlde úshin talasady
ASTANA. QazAqparat - Habarovsk qalasynda dopty hokkeıden ótip jatqan álem chempıonatynda Qazaqstan quramasy jartylaı fınalda shvedtermen aıdynǵa shyqty, dep habarlaıdy QazAqparat tilshisi.
Asa tartysty ótken matchta qazaqstandyqtar ótken jylǵy álem chempıonyna 4:5 esebimen ese jiberdi. Bul oıynda qazaqstandyqtardan Artem Vshıvkov het-trıktiń avtory atansa, taǵy bir goldy Rýslan Galıaýtdınov soqty. Ekinshi jartylaı fınalda reseılikter fın quramasyn 8:2 esebimen utty.
Osylaısha, erteń shvedter men reseılikter altyn medal úshin talassa, qazaqstandyqtar men fınder qola júldege ıe bolý úshin aıdynǵa shyǵady.
