Dopty hokkeıden ÁCh: Qazaqstan quramasy alǵashqy kezdesýin fındermen ótkizedi
ORAL. QazAqparat - Shvetsııanyń Venersborg qalasynda dopty hokkeıden jalaýyn kóteretin álem chempıonatynda Qazaqstan quramasy búgin alǵashqy kezdesýin fındermen ótkizedi, dep habarlaıdy QazAqparat tilshisi.
Osymen 39-shy ret uıymdastyrylyp otyrǵan dúnıejúzilik doda 2 aqpanda márege jetip, jeńimpaz-júldegerler anyqtalady.
Kúshtilerdiń «A» tobynda óner kórsetetin Qazaqstan quramasynyń buǵan deıin alty márte qola júldeger atanǵany belgili. Mine, sol qola júlde úshin básekede únemi fındermen taıtalasady. Ádette Reseı men Shvetsııa quramalary altyn júlde úshin talasady. Fın quramasy 2004 jyly Shvetsııanyń Vesteros qalasynda ótken álem chempıonatynda ǵana jeńimpaz atanyp, sodan keıin eki márte fınalǵa shyǵyp, kúmis júldeni qanaǵat tutqan bolatyn.
Bul joly reseılik bapker Sergeı Infalın jattyqtyratyn qazaqstandyqtarǵa júlde úshin talasý qıyndaý soǵady. Óıtkeni qazaqstandyq quramanyń negizin joǵary lıga komandalary arasynda búkilreseılik jarysqa turaqty qatysyp júrgen oraldyq «Aqjaıyqtyń» oıynshylary quraıdy. Sondyqtan bıyl, mamandardyń pikirinshe, basty maqsat - kúshtilerdiń «A» tobynda qalý.
Qazaqstan quramasy sondaı-aq 28 qańtarda Reseı, 30-ynda Shvetsııa bendı sheberlerimen kúsh synasady.
«El namysyn abyroımen qorǵaý úshin bar kúshimizdi salamyz. Aıdynǵa quramany kapıtanymyz, Oral dopty hokkeıiniń túlegi, Reseıdiń sýperlıgasynda oınaıtyn «Sıbselmash» (Novosibir) komandasynda óner kórsetetin Raýan Isalıev bastap shyǵady», dedi QazAqparat tilshisine Qazaqstan quramasynyń múshesi, «Aqjaıyq» komandasynyń kapıtany Maksım Ótebalıev.
«Aqjaıyq» hokkeıshileri bul kúnderi 19 jasqa deıingiler arasynda Krasnoıarsk qalasynda ótip jatqan álem chempıonatyna da qatysýda. Ókinishke qaraı, qazaqstandyqtar Norvegııadan 0:12, Fınlıandııadan 0:11, Shvetsııadan 0:21 esebimen oısyraı jeńilip qaldy. Búgin Reseımen sheberlik baıqasady.
Oǵan qosa qazaqstandyq bendı sheberleri naýryz aıynda osy Krasnoıarskide ótetin dúnıejúzilik ýnıversıadaǵa da barady.
Eske sala keteıik, budan buryn dopty hokkeıden ulttyq quramanyń negizin «Aqjaıyq» oıynshylary quraıtynyn jazǵan bolatynbyz.
