Dopty hokkeıden ÁCh: Qazaqstan qola júlde úshin fındermen kúsh synasady
ORAL. QazAqparat - Shvetsııanyń Venersborg qalasynda dopty hokkeıden ótip jatqan álem chempıonatynda Qazaqstan quramasy jartylaı fınalda aıdyn ıelerimen kezdesti, dep habarlaıdy QazAqparat tilshisi.
Bıyl dopty hokkeıden álemdik doda 39-shy ret uıymdastyryldy. Osyǵan deıin 12 márte chempıon atanǵan shvedterdiń asa kúshti qarsylas ekendigi belgili.
Bul joly da Shvetsııa aıqyn basymdyq kórsetip, 20:1 esebimen jeńiske jetti (qazaqstandyqtardan gol soqqan Artem Vshıvkov, pas bergen «Aqjaıyq» komandasynyń kapıtany Maksım Ótebalıev. Maksım qos quramanyń osy birinshiliktegi alǵashqy kezdesýinde jalǵyz doptyń avtory atanǵan edi, onda shvedter 22:1 esebimen utqan bolatyn).
Ekinshi jartylaı fınalda Reseı quramasy fınderdi 6:2 esebimen tize búktirdi.
Osylaısha senbi kúni Keńes odaǵy jetistikterin qosqanda, 25 márte álem chempıony atanǵan Reseı men Shvetsııa komandalary altyn júlde úshin talasady. Al Fınlıandııa men Qazaqstannyń bendı sheberleri qola júldeni sarapqa salady. «A» tobynda buǵan deıin fınder qazaqstandyqtardy 9:0 esebimen utqan bolatyn.
Álem chempıonattarynda ádette reseılikter men shvedter bas júlde úshin aıdynǵa shyqsa, fınder men qazaqstandyqtar qolaǵa baryn salatyn. Degenmen fınder osyǵan deıin bir ret álem chempıony atanyp, eki márte kúmis júldeni jeńip alǵan-dy (qazaqstandyqtardyń enshisinde - alty qola medal). Onyń ústine bıyl Qazaqstan reseılik legıonerlerge ıek artpaı, negizinen «Aqjaıyq» hokkeıshilerine sendi. Olardyń arasynda jastar da az emes. Bul - eń aldymen bolashaqty kózdegendik. Sondaı-aq, álemniń myqtylarymen aıdynda kúsh synasyp, tájirıbe jınaqtaıtyny anyq.
Bıyl oraldyq bendı sheberleri Krasnoıarsk qalasynda ótetin dúnıejúzilik ýnıversıadaǵa da qatysady.
Eske sala keteıik,budan buryn qazaqstandyqtardyń Norvegııany utyp, jartylaı fınalǵa shyqqanyn jazǵan bolatynbyz.
