Dopty hokkeıden ÁCh: Qazaqstan qola júlde úshin básekede jeńilip qaldy
ORAL. QazAqparat - Reseıdiń Habarovsk qalasynda dopty hokkeıden ótip jatqan álem chempıonatynda Qazaqstan men Fınlıandııa quramalary qola júldeni sarapqa saldy, dep habarlaıdy «QazAqparat» tilshisi.
Bul match fınderdiń basymdylyǵymen ótti. Olar birinshi taımda 3:1 esebimen alda tursa, kezdesýdiń ekinshi bóliginde 8:4-ke jetkizdi. Qazaqstannan komanda kapıtany Raýan Isalıev qos goldyń avtory atansa, Dmıtrıı Zavıdovskıı men Artem Vshıvkov bir-birden dop soqty.
Osylaısha, buǵan deıin álem birinshiliginiń alty márte qola júldegeri atanǵan qazaqstandyqtar sol tabysyn qaıtalaı almady.
Bir jubantarlyǵy, bıyl reseılik maman Ilıas Handaev jattyqtyrǵan komanda jartylaı fınalǵa shyǵyp, úzdik tórttiktiń qataryna qaıta qosyldy. Dúnıejúzilik dodaǵa Oraldyń «Aqjaıyǵynan» qaqpashy Narıman Takırov, jartylaı qorǵaýshy Sultan Qadyrjanov, shabýylshy Maksım Ótebalıev qatysty. R.Isalıevke qosa Oral dopty hokkeıiniń túlekteri Denıs Maksımenko men Eskendir Nuǵmanov ta el namysyn qorǵady. Degenmen, quramada negizinen túptamyry reseılik oıynshylar óner kórsetetinin eskersek, Qazaqstannyń ózinde shaıbaly hokkeıdegi Astananyń «Barysy» sekildi keminde bir sýperklýb qurmaıynsha, jaǵdaıdyń jaqsara qoımasy anyq. Oraldyń «Aqjaıyǵy» búkilreseılik jarysta ázirge joǵary lıgadan asa almaı keledi.
