Dopty hokkeıden ÁCh-da fınderdi jeńgen qazaqstandyqtar shırek fınalda norvegtermen kezdesedi
ASTANA. QazAqparat - Reseıdiń Ýlıanovsk qalasynda dopty hokkeıden ótip jatqan kezekti, 36-ynshy álem chempıonatynda keshe Qazaqstan quramasy fınderdi 5:4 esebimen utty.
Bul joly qazaqstandyqtar qaqpasyn Oral dopty hokkeıiniń túlegi, qazir Saratovtyń «Ýnıversalynda» óner kórsetetin Іlııas Haırekeshev qorǵady. Al alǵashqy goldy 19-mınýtta taǵy bir batysqazaqstandyq, Qazaqstan quramasynyń kapıtany, Reseı chempıonatynyń sýperlıgasynda («Sıbselmash», Novosibir) oınap júrgen Raýan Isalıev saldy. Oıyn barysynda Qazaqstan quramasynan Anatolıı Golýbkov het-trıktiń avtory atansa, sonyń ekeýin 12 metrlik penaltıden engizdi. Taǵy bir gol Dmıtrıı Zavıdovskııdiń enshisinde.
Sóıtip osynyń aldynda Reseı men Shvetsııa quramalarynan iri eseppen utylyp qalǵan Alekseı Nıkıshovtyń shákirtteri birinshiliktegi alǵashqy jeńisine qol jetkizdi. Osylaısha myqtylardyń «A» tobynda úshinshi oryndy ıelenip, pleı-off básekesine shyqqan qazaqstandyqtar búgin, 4 aqpan kúni shırek fınalda Norvegııa quramasyn tize búktirse, onda júldeli oryndar úshin talasady.
Eske sala keteıik, osyǵan deıin Qazaqstan quramasy alty ret álem chempıonatynyń qola júldegeri atansa, sonyń bárinde de úshinshi oryn úshin básekede fınderdi jeńgen bolatyn.
