Dopty hokkeı: Oraldyń «Aqjaıyǵy» taǵy da utylyp qaldy
ORAL. QazAqparat - Dopty hokkeıden joǵary lıga komandalary arasynda Syktyvkar qalasynda ótip jatqan fınaldyq týrnırde Oraldyń «Aqjaıyǵy» sátsiz óner kórsetýde, dep habarlaıdy «QazAqparat» HAA tilshisi.
Reseı dopty hokkeı federatsııasynyń saıtynan alynǵan málimetke qaraǵanda, bul joly oraldyqtar aıdyn ıeleri «Stroıtel» komandasyna tótep bere almaı, 3:7 esebimen jeńilis tapty. Batysqazaqstandyqtardan komanda kapıtany Maksım Ótebalıev qos doptyń avtory atansa, taǵy bir goldy onyń attasy, reseılik legıoner Maksım Nıkıshov soqty.
Osyǵan deıin Krasnotýrınskiniń «Maıagynan» 3:5, Mýrmanskiniń «Mýrman» komandasynan 0:7 esebimen utylǵan «Aqjaıyqtyń» endi eki-aq oıyny qaldy. Olar senbi kúni «Saıany» (Abakan), jeksenbide «Znamıa-Ýdmýrtııa» (Votkınsk) klýbtarymen kúsh synasady.
