Dopty hokkeı: Oraldyń «Aqjaıyǵy» «Maıakty» 8:1 esebimen oısyrata utty
ORAL. QazAqparat - Dopty hokkeıden Reseı chempıonaty joǵary lıgasynyń ekinshi tobynda óner kórsetip júrgen Oraldyń «Aqjaıyǵy» búgin óz aıdynynda «Maıak» (Krasnotýrınsk) komandasymen ekinshi oıynynda da jeńiske jetti, dep habarlaıdy «QazAqparat» HAA tilshisi.
Bul joly aıdyn ıeleri osy topta 36 upaımen kósh bastap kele jatqan qarsylasyn 8:1 esebimen kúırete jeńdi. Degenmen birinshi taımda 33-mınýtta qonaqtar (Dmıtrıı ıAroslavtsev) esep ashty. 41-mınýtta «Aqjaıyqtyń» mergen shabýylshysy, reseılik Sergeı Bashaev esepti teńestirip úlgerdi. Al kezdesýdiń ekinshi kezeńinde oraldyqtar jaýapsyz jeti dop soqty. S.Bashaev barlyǵy alty doptyń avtory atansa, komanda kapıtany Maksım Ótebalıev pen Elaman Álipqalıev «Maıaktyń» qaqpasynan bir retten sańylaý tapty.
Sóıtip osy matchtan keıin 28 upaı jınaǵan «Aqjaıyq» týrnır kestesinde ekinshi orynǵa kóterildi. Degenmen 27 upaımen úshinshi satyda turǵan «Znamıa-Ýdmýrtııa» (Votkınsk) komandasynyń eki oıyny kem.
Batysqazaqstandyqtar kelesi kezdesýlerin 21-22 qańtarda óz aıdynynda altynshy oryndaǵy «SKA-Sverdlovsk» (Ekaterınbýrg) komandasymen ótkizedi. Demek, upaı qoryn molaıta túsýge múmkindikteri mol.
