Dopty hokkeı: Oraldyń «Aqjaıyǵy» maýsymdy qorytyndylady
ORAL. QazAqparat - Búkilreseılik jarystyń joǵary lıgasynda óner kórsetetin Oraldyń «Aqjaıyǵy» 2018-2019 jylǵy maýsymdy qorytyndylady, dep habarlaıdy QazAqparat tilshisi.
Oraldyqtar búgin «Jastar» stadıonynda «Nıkelşık» (Verhnıı Ýfaleı) komandasymen sońǵy oıynyn ótkizdi.
Bul kezdesýde qonaqtar 4:3 esebimen jeńiske jetti. Birinshi taımda «Nıkelşık» 4:1 esebimen alǵa shyqty. Matchtyń ekinshi bóliginde oraldyqtar qarqyndy údetip, eki gol soqqanymen, teń nátıjege de qol jetkize almady. Bul - «Aqjaıyqtyń» óz aıdynyndaǵy alǵashqy jeńilisi.
Osylaısha ekinshi topta 33 upaımen besinshi orynǵa ornyqqan Nıkolaı Shavaldınniń shákirtteri fınaldyq saıystardan tys qaldy.
«Aqjaıyq» sońǵy ret fınaldyq saıystarǵa budan eki jyl buryn joldama alyp, Syktyvkar qalasynda óner kórsetip qaıtqan bolatyn.
Bir aıta ketetin jaıt, bıyl Shvetsııada ótken álem chempıonatynda el namysyn qorǵaǵan Qazaqstan quramasynyń negizin burynǵydaı reseılik legıonerler emes, alǵash ret «Aqjaıyq» hokkeıshileri qurady. Soǵan qaramastan, qazaqstandyqtar tórtinshi orynǵa ıe bolyp, kúshtilerdiń «A» tobynda qaldy. Eń bastysy, jas oıynshylar tájirıbe jınaqtady.
«Aqjaıyq» sport klýby dırektorynyń mindetin atqarýshy Armat Meńdeshevtiń aıtýynsha, komanda aldaǵy maýsymda fınaldyq saıystarǵa iligý úshin bar kúshin salady. Bul úshin barlyq jaǵdaı bar, ótken jyly jasandy muz aıdyny iske qosyldy.
Erteń bas bapker Nıkolaı Shavaldın bastaǵan «Aqjaıyq» komandasynyń segiz oıynshysy naýryz aıynda Krasnoıarsk qalasynda ótetin dúnıejúzilik qysqy ýnıversıadaǵa qatysý úshin Astanaǵa attanady. Onda Qazaqstan quramasy júldeli oryndar úshin talasýdy maqsat etip otyr.
Eske sala keteıik, «Aqjaıyq» keshe «Nıkelşık» komandasyn jeńgen edi.
