Dopty hokkeı: Oraldyń «Aqjaıyǵy» fınaldyq saıystarǵa joldama aldy
ORAL. QazAqparat - Dopty hokkeıden Reseı chempıonaty joǵary lıgasynda óner kórsetetin Oraldyń «Aqjaıyǵy» búgin «Stenovık» stadıonynda Verhnıı Ýfaleıdiń «Nıkelşık» komandasymen ekinshi kezdesýinde de jeńiske jetti, dep habarlaıdy «QazAqparat» HAA tilshisi.
Oraldyqtardan komandanyń eń mergen shabýylshysy Sergeı Bashaev bul joly het-trıktiń avtory atansa, sondaı-aq Petr Grıbanov, Elaman Álipqalıev, Andreı Gýşın bir-birden gol soqty. Oǵan qosa S.Bashaev 45-mınýtta 12 metrlik aıyp dobyn engize almady. Soǵan qaramastan, «Aqjaıyq» qonaqtardy 6:2 esebimen tize búktirdi.
Reseılik maman Vladımır Kojevnıkov baptaıtyn batysqazaqstandyqtar ekinshi toptaǵy sońǵy oıyndaryn 21-22 aqpan kúnderi óz aıdynynda týrnır kestesinde 45 upaımen kósh bastap kele jatqan «Znamıa-Ýdmýrtııa» (Votkınsk) komandasymen ótkizedi. Oraldyqtar 43 upaımen úshinshi satyda tur.
«Aqjaıyq» sport klýbynyń dırektory Azamat Shaıhynyń aıtýynsha, sońǵy matchtardyń nátıjesine qaramastan, oraldyqtar fınaldyq saıystarǵa joldama aldy. Sýperlıga joldamasy sarapqa salynatyn fınaldyq týrnır 28 aqpan - 6 naýryz kúnderi Syktyvkar qalasynda ótedi. Oǵan ár topta úzdik úshtikke ilingen toǵyz komanda qatysady.
