Dopty hokkeı: Oraldyń «Aqjaıyǵy» betashar matchynda qarsylasyna ese jiberdi
ORAL. QazAqparat – Dopty hokkeıden joǵary lıga komandalary arasyndaǵy búkilreseılik jarysta Oraldyń «Aqjaıyǵy» jańa maýsymdaǵy alǵashqy matchyn Verhnıı Ýfaleıde «Nıkelşık» klýbymen ótkizdi, dep habarlaıdy QazAqparat tilshisi.
Kezdesý asa tartysty ótti.
Birinshi taımda aıdyn ıelerinen 30-mınýtta Anton Ponomarev esep ashqanymen, 43-mınýtta «Aqjaıyq» quramyndaǵy reseılik legıoner Maksım Pahomov tarazy basyn teńestirdi.
Oıynnyń ekinshi kezeńinde taǵy bir reseılik Sergeı Bashaev (60-mınýt) oraldyqtardy alǵa shyǵardy. Alaıda 70-mınýtta qonaqtar qaqpasyna belgilengen 12 metrlik aıyp dobyn Aleksandr Beskrovnyı dál oryndady. 87-mınýtta «Aqjaıyq» qaqpashysy Vıacheslav Gorchakov taǵy bir penaltıdi qaıtarǵanymen, Dmıtrıı Shadrın jeńis golyn soǵyp ketti.
Osylaısha «Nıkelşık» komandasy 3:2 esebimen jeńiske jetti.
Reseılik tóreshiler qonaqtardy 80 mınýttyq aıyp ýaqytymen jazalap, tipti 85-mınýtta oraldyq qorǵaýshy Ilıa Glýhovqa qyzyl qaǵaz kórsetip, aıdynnan qýdy.
Komandalar erteń ekinshi kezdesýin ótkizedi.
Eske sala keteıik, budan buryn «Aqjaıyqtyń» quramynda birqatar ózgerister bolǵanyn jazǵan edik.
