Dopty hokkeı: Qazaqstandyq shabýylshy Reseı chempıonatyndaǵy matchta bes gol soqty
ASTANA. QazAqparat - Dopty hokkeıden Reseıdiń sýperlıgasynda Novosibirdiń «Sıbselmash» komandasy «Stroıteldi» (Syktyvkar) qabyldap, iri eseppen jeńiske jetti, dep habarlaıdy QazAqparat tilshisi.
«Sıbselmash» stadıonynda ótken match aıdyń ıeleriniń aıqyn basymdylyǵyn pash etti - 10:4.
Bul kezdesýde Qazaqstan ulttyq quramasynyń kapıtany, Oral dopty hokkeıiniń túlegi Raýan Isalıev bir ózi bes goldyń avtory atandy.
Kópten beri «Sıbselmash» sapynda óner kórsetetin R.Isalıev qazirdiń ózinde klýb tarıhyndaǵy eń úzdik mergenderdiń birine aınalyp úlgerdi.
Osynyń aldynda 18 aqpan kúni Kırov qalasynda jergilikti «Rodınanyń» qaqpasyna qos gol engizgen Raýan Reseı chempıonatynda soqqan dop sanyn 201-ge jetkizgen edi.
Bendımen aınalysýdy Oral qalasynda, «Aqjaıyq» komandasynda bastaǵan R.Isalıev keıin reseılik «Vodnık» (Arhangelsk), «Start» (Nıjnıı Novgorod) klýbtarynda oınady. 2012 jyldan beri «Sıbselmashtyń» namysyn qorǵap keledi.
2011 jyly Almatyda ótken Azııa oıyndarynyń chempıony ári úzdik mergeni, 2012, 2013, 2014 jáne 2015 jylǵy álem birinshiliginiń qola júldegeri boldy.
Raýan 2018 jyly Habarovsk qalasynda ótken álem chempıonatynyń úzdik mergeni atandy. Ol sonda 21 gol soǵyp, 7 márte nátıjeli pas berdi.
Bıyl Shvetsııanyń Venersborg qalasynda ótken álem chempıonatynan da R.Isalıev qur ketpeı, tórt goldyń avtory atandy.
Eske sala keteıik, budan buryn Qazaqstan quramasynyń álem chempıonatynda tórtinshi orynǵa taban tiregenin jazǵan bolatynbyz.
Jýyrda maýsymdy qorytyndylaǵan «Aqjaıyqtyń» kapıtany Maksım Ótebalıev bastaǵan segiz oıynshy Krasnoıarsk qalasynda ótetin HHІH Qysqy ýnıversıadada el namysyn qorǵaıdy.
Búgin olar Qazaqstan quramasy sapynda Qysqy ýnıversıadaǵa attandy.
Foto: Sports.kz
