Dopty hokkeı: Qazaqstan quramasynyń qarsylasy belgili boldy
ASTANA. QazAqparat - Reseıdiń Habarovsk qalasynda dopty hokkeıden ótip jatqan álem chempıonatynda Qazaqstan quramasy shırek fınalda Norvegııa komandasymen kúsh synasady, dep habarlaıdy «QazAqparat» tilshisi.
Búgin norvegter fın quramasynan 0:7 esebimen oısyraı utylyp, A tobynda tórtinshi orynda qaldy. Qazaqstandyqtar V tobynda birinshi orynǵa ıe bolǵan edi. Osylaısha, 2 aqpan kúni Qazaqstan men Norvegııa quramalary jartylaı fınal joldamasyn sarapqa salady. Munda joly bolǵan komanda fınalǵa shyǵý úshin Fınlıandııa - AQSh kezdesýindegi jeńimpazben kezdesedi.
Eske sala keteıik, reseılik maman Ilıas Handaev pen oraldyq bapker Nıkolaı Shavaldın jattyqtyratyn qazaqstandyqtar óz tobynda aldymen Vengrııany 29:0, sosyn AQSh komandasyn 14:1, búgin Germanııa eliniń ókilderin 17:2 esebimen tize búktirgen bolatyn. Bul oıyndarda, ásirese, komanda kapıtany, Oral dopty hokkeıiniń túlegi Raýan Isalıev erekshe kózge tústi. Raýan qarsylastar qaqpasyna birinshi kezdesýde segiz, sodan keıingi eki matchta tórt-tórtten, barlyǵy 16 gol soqty. Sondaı-aq «Aqjaıyqtan» alynǵan Maksım Ótebalıev, Sultan Qadyrjanov jáne Oral dopty hokkeıiniń taǵy bir túlegi Eskendir Nuǵmanovtyń da qanjyǵalary maılandy. Sonymen qatar Germanııamen ótken matchta qaqpaǵa «Aqjaıyqtyń» ókili Narıman Takırov turdy.
Buǵan deıin álem chempıonatynyń alty márte qola júldegeri atanǵan qazaqstandyqtar ótken jyly Shvetsııada bolǵan dodada shırek fınalda óziniń basty qarsylasy - Norvegııadan utylyp qalǵan bolatyn. Sóıtip kúshtiler tobynan yǵysyp qalǵan edi. Bıyl sonyń qarymtasyn qaıtarý úshin baryn salýlary tıis.
