Dopty hokkeı: Qazaqstan quramasy jartylaı fınalda reseıliktermen kezdesedi
ASTANA. QazAqparat - Búgin, 2 sáýir kúni Reseıdiń Habarovsk qalasynda dopty hokkeıden álem chempıonatynyń sheshýshi oıyndary bastalady.
Reseı dopty hokkeı federatsııasy saıtynan alynǵan málimetke qaraǵanda, jartylaı fınalda Shvetsııa quramasy fındermen aıdynǵa shyqsa, qazaqstandyqtar álem chempıondary - reseıliktermen sheberlik baıqasady. Munda jeńgen komandalar fınalda altyn júldeni sarapqa salsa, utylǵandary qola júlde úshin kúsh synasady.
Osyǵan deıin Alekseı Nıkıshov jattyqtyratyn Qazaqstan quramasy birinshi oıynda 1:10 esebimen reseılikterge ese jiberse, sodan keıin 4:9 esebimen shvedterden utyldy. 31 naýryzda fındermen 3:3 esebimen teń oınady. Al 1 sáýir kúni shırek fınalda Belarýs eliniń quramasyn 26:8 esebimen tize búktirdi.
Aıta keteıik, Qazaqstan ulttyq quramasy sapynda Oral dopty hokkeıiniń túlekteri de oınaýda. Komanda kapıtany, shabýylshy Raýan Isalıev osyǵan deıingi matchtarda qarsylastar qaqpasyna bes gol engizse, Leonıd Bedarev úsh doptyń avtory atandy. Sondaı-aq Eskendir Nuǵmanov Belarýs quramasymen oıynda óz esebine úsh goldy jazdy.
