Dopty hokkeı: Qazaqstan quramasy úshinshi ret qatarynan qola júldeger atandy
ORAL. QazAqparat - Irkýtsk qalasynda márege jetken dopty hokkeıden álem chempıonatynda Qazaqstan quramasy qola júldeger atandy.
Úshinshi oryn úshin básekede qazaqstandyqtar ózderiniń turaqty qarsylasy - fındermen sheberlik baıqasty. Kezdesý Alekseı Nıkıshovtyń shákirtteri úshin sátsiz bastalyp, fınder birinshi taımda 2:0 esebimen alǵa shyqty. Degenmen ekinshi taımda qazaqstandyq bendı sheberleri tarazy basyn aýdara bildi. Sóıtip 5:3 esebimen jeńiske jetti. Oıyn núktesin komanda kapıtany Raýan Isalıev qoıdy.
Sonymen, qazaqstandyqtar úshinshi ret qatarynan álem birinshiliginiń qola medalin ıelendi. Al fınalda reseılikter shvedterdi 3:2 esebimen jeńip, álem chempıony ataǵyn saqtap qaldy.
