Dopty hokkeı: Qazaqstan quramasy álem chempıonatynyń jartylaı fınalyna shyqty
ASTANA. QazAqparat - Búgin Ýlıanovsk qalasynda dopty hokkeıden ótip jatqan álem chempıonatynyń shırek fınalynda Qazaqstan quramasy norvegterdi 11:3 esebimen tize búktirdi.
Reseı dopty hokkeı federatsııasynan alynǵan málimetke qaraǵanda, Qazaqstannyń eńbek sińirgen jattyqtyrýshysy Alekseı Nıkıshov bastaǵan mamandar jattyqtyratyn komandadan Vıacheslav Bronnıkov tórt, Raýan Isalıev úsh, Rýslan Galıaýtdınov eki doptyń avtory atandy. Maksım Gavrılenko men Sergeı Pochkýnov bir-birden gol soqty.
Qazaqstan quramasy jartylaı fınalda Reseı-AQSh jubynyń jeńimpazymen kezdesedi. Bul matchta reseılikter jeńýi tıis.
Eske sala keteıik, aınalym týrnırinde qazaqstandyqtar 1 aqpan kúni reseılikterden 1:9 esebimen oısyraı jeńilgen bolatyn. Jartylaı fınalda jeńiske jetkender altyn, utylǵandar qola júlde úshin talasady.
