Dopty hokkeı: Qazaqstan AQSh quramasyn da iri eseppen utty
ORAL. QazAqparat - Reseıdiń Habarovsk qalasynda dopty hokkeıden ótip jatqan álem chempıonatynda Qazaqstan quramasy AQSh komandasyn 14:1 esebimen tize búktirdi, dep habarlaıdy «QazAqparat» tilshisi.
Bul oıynda komanda kapıtany Raýan Isalıev tórt goldyń avtory atandy. Sondaı-aq qarsylastar qaqpasyna Vıktor Chernyshev úsh, Evgenıı Leonov pen Artem Vshıvkov eki-ekiden dop engizdi. Eskendir Nuǵmanov, Rýslan Galıaýtdınov jáne Maksım Ótebalıev bir retten kózge tústi. Amerıkalyqtardan Kevın Braýn bir ǵana golmen jaýap qaıyrdy.
Eske sala keteıik, keshe Ilıas Handaevtyń shákirtteri Vengrııa quramasyn 29:0 esebimen utqan bolatyn. Onda Raýan Isalıev segiz gol soqqan edi. Erteń qazaqstandyqtar Germanııa quramasymen aıdynǵa shyǵady.
