Dopty hokkeı: fınaldyq týrnırdiń alǵashqy oıynynda «Aqjaıyq» jeńilip qaldy
ORAL. QazAqparat - Búgin dopty hokkeıden joǵary lıga komandalary arasynda Syktyvkar qalasynda ótip jatqan fınaldyq týrnırde Oraldyń «Aqjaıyǵy» alǵashqy oıynynda «Maıak» (Krasnotýrınsk) komandasymen kúsh synasty, dep habarlaıdy «QazAqparat» HAA tilshisi.
Reseı dopty hokkeı federatsııasynyń saıtynan alynǵan málimetke qaraǵanda, oraldyqtar birinshi taımda reseılik legıonerler Artem Nedostýpov pen Sergeı Bashaevtyń goldarynan keıin áýeli tarazy basyn teńestirip, sodan keıin 2:1 esebimen alǵa shyqqanymen, sol basymdylyqty ustap tura almady. Nátıjesinde Oral dopty hokkeıiniń túlegi Oleg Chernov jattyqtyratyn «Maıak» komandasy 5:3 esebimen jeńiske jetti. «Aqjaıyqtan» taǵy bir dopty Elaman Álipqalıev engizdi.
Endi reseılik maman Vladımır Kojevnıkov baptaıtyn batysqazaqstandyqtar erteń «Mýrman» (Mýrmansk), 3 naýryzda «Stroıtel» (Syktyvkar), 4-inde «Saıany» (Abakan), 5-inde «Znamıa-Ýdmýrtııa» (Votkınsk) komandalarymen kezdesedi.
