Dopty hokkeı: búgin Irkýtsk qalasynda álem chempıonaty bastalady

Myqtylardyń «A» tobynda synǵa túsetin Qazaqstan ulttyq quramasy bastapqy kezdesýin álem chempıony - reseıliktermen ótkizedi. Sodan keıin 27 qańtarda shvedtermen, 29 qańtarda fındermen aıdynǵa shyǵady.

Qazaqstan quramasynyń bas bapkeri Alekseı Nıkıshov bolsa, oǵan Marat Manǵýbaev, Alekseı Zolotarev syndy mamandar kómektesýde.

Qazaqstandyqtar osyǵan deıin 2003 (Arhangelsk), 2005 (Qazan), 2012 (Almaty) jáne 2013 (Venersborg) jyldary ótken álem birinshilikterinde fın quramasymen aıqasta tórt márte qola júldeni jeńip aldy. Ásirese, Almatyda ótken chempıonatta jartylaı fınalda qazaqstandyqtar shvedterden tek penaltı soǵýda ǵana utylyp, fınalǵa shyǵatyn (onda keminde kúmis medaldi ıelenetin edi) múmkindikti jiberip aldy.

Qazaqstan quramasynda Oral dopty hokkeıiniń bes birdeı túlegi oınaıdy. Sonyń biri, ulttyq qurama kapıtany, Reseı chempıonatynyń sýperlıgasyndaǵy Novosibirdiń «Sıbselmashynda» óner kórsetip júrgen Raýan Isalıevtiń sózine qaraǵanda, eki jyl qatarynan qola medaldi ıelengen qazaqstandyqtar bul chempıonatta da júldeli oryndar úshin talasatyn bolady.