Dopty hokkeı: Basty maqsat - ýnıversıadada júldeli oryn alý
ORAL. QazAqparat - Dopty hokkeıden Oraldyń «Aqjaıyǵy» joǵary lıga komandalary arasynda búkilreseılik jarysta kezekti maýsymyn bastaıdy, dep habarlaıdy QazAqparat tilshisi.
«Aqjaıyq» sport klýbynyń dırektory mindetin atqarýshy Armat Meńdeshevtiń aıtýynsha, qurylǵanyna 40 jyldan asqan oraldyq komandanyń baı tarıhy bar.
«Aqjaıyq» bıyl da ekinshi topta «Maıak» (Krasnotýrınsk), «SKSO «SKA-Sverdlovsk» (Ekaterınbýrg), «Dınamo-Qazan-2» (Qazan), «Nıkelşık» (Verhnıı Ýfaleı), «Znamıa-Ýdmýrtııa» (Votkınsk), «Lokomotıv» (Orynbor) komandalarymen birge óner kórsetedi.
Bıylǵy bir jańalyq, komandany oraldyq bapker Nıkolaı Shavaldın bastaǵan mamandar jattyqtyrady. Tájirıbeli hokkeıshilerdiń biri, 1990 jylǵy Elaman Álipqalıev ári oınaıdy ári jattyqtyrýshy retinde óz baǵyn synap kórmek. Quramda basqalaı kóp ózgeris joq. Negizinen komanda kapıtany Maksım Ótebalıev bastaǵan jergilikti hokkeıshiler oınaıdy. Reseılikter Aleksandr Podmetalın, Sergeı Panteev, Aleksandr Chkalovqa qosa Hromtaý dopty hokkeıiniń túlekteri Azat Bekturǵan men Qýanysh Temirálın «Aqjaıyqqa» kómektespekshi.
«Bıyl komanda oınaıtyn «Jastar» stadıonynda jasandy muz aıdyny paıdalanýǵa berilgeni belgili. Sondyqtan hokkeıshiler maýsymǵa daıyndyǵyn jyldaǵydan erte bastady. Bul da olardyń sheberligin arttyrýǵa septesetini anyq. Aldaǵy maqsat - jaqsy oıyn órnegin kórsete bilip, ekinshi topta úzdikter qatarynan kórinip, fınaldyq saıystarǵa joldama alý», deıdi Armat Meńdeshev.
N.Shavaldınniń shákirtteri alǵashqy kezdesýlerin 29-30 qarasha kúnderi Krasnotýrınsk qalasynda «Maıak» komandasymen ótkizedi.
Oraldyq stadıonda jasandy muz aıdynynyń jasalýy iri jarystardy ótkizýge de múmkindik beredi. Mysaly, 23-26 qarasha aralyǵynda dopty hokkeıden 2002 jylǵy jáne odan kishi jasóspirimder arasynda el birinshiligi ótedi. Munda bolashaqta aldyńǵy býynnyń izin basatyn jas hokkeıshiler kózge túsip, irikteledi degen úmit bar.
«Bizdiń basty maqsatymyz - árıne, aldaǵy jyly 2-12 naýryz aralyǵynda Reseıdiń Krasnoıarsk qalasynda ótetin HHІH Dúnıejúzilik qysqy ýnıversıadada júldeli orynǵa iligý. Onda aıdyn ıeleri chempıondyq ataqty eshkimge bere qoımas. Degenmen qalǵan júldeli oryndar úshin talasýǵa tolyq múmkindik bar. Ýnıversıadada el namysyn jasy 25-ten aspaǵan «Aqjaıyq» hokkeıshileri qorǵaıtyn bolady», dedi QazAqparat tilshisine A.Meńdeshev.
Aıta keteıik, dopty hokkeıden 2019 jylǵy álem chempıonaty 26 qańtar - 2 aqpan aralyǵynda Shvetsııanyń Venersborg qalasynda ótedi. Ótken jyly «Aqjaıyqtan» el quramasyna komanda kapıtany Maksım Ótebalıev bastaǵan úsh oıynshy shaqyrylǵan bolatyn.
2011 jyly dopty hokkeıden Almatyda ótken qysqy Azııa oıyndarynda negizin «Aqjaıyq» hokkeıshileri quraǵan Qazaqstan quramasynyń chempıon atanǵany málim. 
