Dopty hokkeı: «Aqjaıyq» joǵary lıganyń fınaldyq týrnırine joldama aldy

Nıkolaı Shavaldın jattyqtyratyn oraldyqtar ekinshi topta «Znamıa-Ýdmýrtııa» (Votkınsk) komandasymen birge joldamaǵa ıe boldy.

Reseı dopty hokkeı federatsııasynyń saıtynan málim bolǵandaı, taǵy bir úmitker klýb – «Maıak» (Krasnotýrınsk) búgin Pervoýralskide «SKA-Sverdlovsk» komandasynan 2:5 esebimen jeńilis taýyp, 54 upaımen úshinshi orynda qaldy.

Osylaısha batysqazaqstandyqtar Orynborda «Lokomotıv» komandasymen ótken sońǵy oıynǵa deıin-aq fınaldyq kezeńge joldama aldy.

«Orynbor» stadıonynda bolǵan matchta «Aqjaıyq» birden alǵa umtylyp, komanda surmergeni, reseılik legıoner Maksım Pahomov esep ashty. Budan keıin aıdyn ıelerinen Sergeı Romashov tarazy basyn teńestirgenimen, Sergeı Bashaev, M.Pahomov jáne Qýanysh Temirálın esepti 4:1-ge jetkizdi.

Ekinshi taımda M.Pahomov tórt márte, Andreı Gýşın, Petr Grıbanov bir retten mergendigimen kózge tústi. «Lokomotıvten» taǵy da S.Romashov qos goldyń avtory atansa, Alekseı Badanın bir dop engizdi.

Qorytyndy esep – 10:4, «Aqjaıyqtyń» paıdasynda.

Budan buryn sýperlıgada da óner kórsetip, ótken jyly «Aqjaıyqqa» qosylǵan Maksım Pahomov osy maýsymda qarsylastar qaqpasyna 73 dop soǵyp, úzdik kórsetkishke qol jetkizdi.

Ekinshi topta oraldyqtar 58 upaı jınady. 56 upaımen ekinshi orynda turǵan «Znamıa-Ýdmýrtııa» ǵana búgin sońǵy básekesinde «Dınamo-Qazan-2» komandasyn jeńse, «Aqjaıyqty» basyp oza alady.

Joǵary lıgada úsh top bolsa, sonyń árqaısysynan qos úzdik komanda fınaldyq týrnırge qatysady.

«Aqjaıyq» sport klýbynyń dırektory Mereı Qanıbetovtyń aıtýynsha, barlyǵy alty komanda sýperlıgaǵa beriletin jalǵyz joldamany sarapqa salady.

Fınaldyq saıystyń ótetin orny keıin anyqtalady.

1976 jyly kásibı klýb retinde qurylǵan «Aqjaıyq» buǵan deıin óz tarıhynda tórt dúrkin fınaldyq saıystardyń qola júldegeri atanǵan edi.

Eske sala keteıik, budan buryn «Aqjaıyqtyń» óz tobynda kósh basyna kóterilgenin jazǵan bolatynbyz.