Dopty hokkeı: «Aqjaıyq» jańa maýsymdy sátsiz bastady

Reseı dopty hokkeı federatsııasynyń saıtynan alynǵan málimetke qaraǵanda, oraldyqtar keshe Krasnotýrınsk qalasynda ótken alǵashqy oıynda 3:7 esebimen jergilikti «Maıaktan» jeńilip qaldy. Bul matchta «Aqjaıyqtan» qarsylastar qaqpasyna birinshi dopty Petr Grıbanov engizse, sodan keıin reseılik legıoner Aleksandr Efımov qos goldyń avtory atandy.

Búgin batysqazaqstandyqtar ekinshi oıynda da «Maıakka» ese jiberip, 4:8 esebimen jeńilis tapty. Birinshi taım barysynda komanda kapıtany Maksım Ótebalıev tarazy basyn teńestirgenimen, odan keıin aıdyn ıeleri des bergen joq. Tek nátıje 1:8 bolǵannan keıin ǵana «Aqjaıyq» es jıǵandaı boldy. Qonaqtardan Aleksandr Efımov, Petr Grıbanov jáne taǵy bir reseılik legıoner Aleksandr Chkalov dop soǵyp, kózge tústi.

Bir qyzyǵy, «Maıak» klýbyn Oral dopty hokkeıiniń túlegi, kezinde KSRO, Qazaqstan quramasy sapynda oınaǵan shabýylshy Oleg Chernov jattyqtyrady.

«Aqjaıyq» sport klýbynyń dırektory Azamat Shaıhynyń aıtýynsha, bıyl komandada pálendeı kóp ózgeris bola qoıǵan joq. Ótken jyly Saratovtan kelgen reseılik maman Vladımır Kojevnıkov burynǵysha bas bapkerlik mindetin atqarady. Sondaı-aq komanda quramynda birneshe reseılik oıynshy óner kórsetedi. Kóp uzamaı Oraldaǵy «Jastar» stadıonynda jasandy muz aıdyny paıdalanýǵa beriledi. Bul hokkeıshilerdiń +10 gradýsqa deıingi jyly kezde de muzda daıyndalýyna múmkindik beredi. Demek, 2016 jyly qurylǵanyna qyryq jyl tolǵan «Aqjaıyq» dopty hokkeı klýbynyń bolashaǵyna senýge bolady.

Aıta keteıik, oraldyqtar ekinshi topta «Maıaktan» basqa «Znamıa-Ýdmýrtııa» (Votkınsk), «SKA-Sverdlovsk» (Ekaterınbýrg), «Lokomotıv» (Orynbor), «Dınamo-Qazan-2» (Qazan), «Nıkelşık» (Verhnıı Ýfaleı) komandalarymen birge synǵa túsedi. Barlyǵy úsh topta úzdik atanǵan komandalar fınaldyq saıystarǵa qatysyp, sýperlıga joldamasyn sarapqa salady.

V.Kojevnıkovtiń shákirtteri kelesi kezdesýlerin 4-5 jeltoqsan kúnderi Pervoýralsk qalasynda «SKA-Sverdlovsk» komandasymen ótkizedi.