Dopty hokkeı: «Aqjaıyq» jańa maýsymdaǵy alǵashqy jeńisine qol jetkizdi
Oral dopty hokkeıiniń túlegi Oleg Chernov jattyqtyratyn «Maıak» – úshinshi toptaǵy myqty komandalardyń biri.
Pandemııaǵa baılanysty ótken maýsymǵa qatysa almaǵan oraldyqtar birinshi matchta aıdyn ıelerine 4:6 esebimen ese jiberdi. «Aqjaıyq» sapynan bul oıynda reseılik shabýylshy Maksım Pahomov tórt goldyń avtory atanyp, erekshe kózge tústi.
Búgin ótken ekinshi kezdesýdi batysqazaqstandyqtar qarqyndy bastap, taǵy bir reseılik Sergeı Bashaev 2-mınýtta esep ashty. Sodan keıin M.Pahomov eki ret mergendik tanytty. Aıdyn ıelerinen Fedor Mıronov esepti qysqartqanymen, taǵy bir reseılik Aleksandr Slýgın 4:1-ge jetkizdi.
Ekinshi taımda «Maıaktan» Maksım Nıkıshov pen Pavel Domrachev bir-bir goldan soqsa, qonaqtardan M.Pahomov ta qarap qalmady.
Osylaısha «Aqjaıyq» 5:3 esebimen jeńiske jetip, bastapqy úsh upaıdy qorjynǵa saldy.
Oraldyq maman Nıkolaı Shavaldınniń shákirtteri kelesi kezdesýlerin 6-7 jeltoqsanda syrt aıdynda «SKA-Sverdlovsk» (Ekaterınbýrg) komandasymen ótkizedi.
Eske sala keteıik, budan buryn «Aqjaıyqtyń» jańa maýsymǵa daıyndalyp jatqanyn, sondaı-aq Táýelsizdiktiń 30 jyldyǵyna oraı elordadan bastalǵan marafonnyń Oralda márege jetkenin jazǵan bolatynbyz.