Dopty hokkeı: «Aqjaıyq» Ýfanyń «Kırovets» komandasyn jeńdi

«Jastar» stadıonynda ótken match 8:1 esebimen aıdyn ıeleriniń paıdasyna sheshildi.

«Aqjaıyq» quramyndaǵy reseılik legıoner Aleksandr Shtele het-trıktiń avtory atansa, Qýanysh Temirálın, Maksım Pahomov, Artem Lapshın, Andreı Gýşın jáne Ilıa Glýhov qarsylastyń qaqpasyna bir-bir goldan soqty. Buǵan ýfalyqtardan birinshi taımda Vladımır Ivanov jalǵyz doppen jaýap qaıyrdy.

Erteń qos klýb ekinshi kezdesýin ótkizedi.

Bul oıynnan keıin 37 upaı jınaǵan Nıkolaı Shavaldınniń shákirtteri ekinshi topta «Kırovetsti» basyp ozyp, úshinshi orynǵa kóterildi. Kósh bastap kele jatqan «Znamıa-Ýdmýrtııa» (Votkınsk) men «Maıak» (Krasnotýrınsk) komandalarynyń enshisinde sáıkesinshe 46 jáne 45 upaıdan bar. Eń úzdik qos komanda fınaldyq saıystarǵa joldama alatynyn eskersek, «Aqjaıyqqa» ol úshin de talasatyndaı múmkindik bar.

Bir aıta ketetin jaıt, Reseı dopty hokkeı federatsııasy málim etkenindeı, Qytaı quramasy dopty hokkeıden erler jáne áıelder arasyndaǵy álem chempıonatyna barmaıtyn boldy.

Munyń sebebi Qytaıdaǵy koronavırýstyń órshýi jáne onyń týrnırge qatysatyn basqa komandalarǵa taralý múmkindigine baılanysty bolyp otyr.

Erler arasynda álem chempıonaty (B toby) 1-6 naýryzda Irkýtskide, áıelderdiń dúnıejúzilik dodasy 19-22 aqpanda Norvegııa astanasy Osloda ótedi.

Qytaı quramasynyń qatyspaýyna baılanysty álem birinshilikteriniń kestesine ózgerister engiziledi.

Erlerdiń A toby komandalary arasynda álem chempıonaty 28 naýryz – 5 sáýir aralyǵynda Irkýstk qalasynda bolmaq. Kúshtiler tobyndaǵy bul jarysqa osyǵan deıin alty márte qola júldeger atanǵan Qazaqstan quramasy da qatysady. Ótken jylǵy dúnıejúzilik dodada tórtinshi orynǵa taban tiregen el quramasy negizinen «Aqjaıyq» hokkeıshilerinen quralǵan bolatyn.

Eske sala keteıik, budan buryn «Aqjaıyqtyń» taǵy da iri eseppen jeńiske jetkenin jazǵan bolatynbyz.