Dopty hokkeı: «Aqjaıyq» tartysty matchta «Nıkelşık» komandasyn utty
ORAL. QazAqparat - Búkilreseılik jarystyń joǵary lıgasynda oınaıtyn Oraldyń «Aqjaıyǵy» «Nıkelşık» (Verhnıı Ýfaleı) komandasyn qabyldady, dep habarlaıdy QazAqparat tilshisi.
Qos komanda ekinshi topta tórtinshi-besinshi oryndardy bólisip, bir-birimen quıryq tistesip kele jatqan-dy.
«Jastar» stadıonynda tartysty ótken matchta birinshi taımda qonaqtar 2:0 esebimen alǵa shyqty.
Oıynnyń ekinshi bóliginde aıdyn ıeleri tarazy basyn ózderine aýdara bildi. Bas bapker Nıkolaı Shavaldınge jattyqtyrýshy esebinde qolushyn berip júrgen tájirıbeli hokkeıshi Elaman Álipqalıev qos goldyń avtory atandy. Taǵy bir dopty «Aqjaıyqtyń» kapıtany Maksım Ótebalıev soqty.
Bul básekeden keıin 33 upaı jınaǵan oraldyqtar tórtinshi orynǵa kóterildi.
Erteń qos komanda ekinshi kezdesýin ótkizedi. Bul batysqazaqstandyq klýbtyń osy maýsymdaǵy sońǵy oıyny bolmaq.
Eske sala keteıik, budan buryn «Aqjaıyqtyń» «Maıak» komandasyn eki oıynda da tize búktirgenin, Oralda dopty hokkeıden respýblıkalyq jarys márege jetkenin jazǵan bolatynbyz.
