Dopty hokkeı: «Aqjaıyq» sońǵy kezdesýinde iri eseppen jeńiske jetti
ORAL. QazAqparat – «Aqjaıyq» Orynborda «Lokomotıvpen» sońǵy oıynynda iri eseppen jeńiske jetti, dep habarlaıdy QazAqparat tilshisi.
Reseı dopty hokkeı federatsııasynyń saıtynan málim bolǵandaı, «Orynbor» stadıonynda bolǵan matchta «Aqjaıyq» birden oıyn tizginin qolǵa aldy.
Komanda surmergeni, reseılik legıoner Maksım Pahomov birinshi bolyp esep ashty. Budan keıin aıdyn ıelerinen Sergeı Romashov tarazy basyn teńestirgenimen, Sergeı Bashaev, M.Pahomov jáne Qýanysh Temirálın esepti 4:1-ge jetkizdi.
Ekinshi taımda M.Pahomov tórt márte, Andreı Gýşın, Petr Grıbanov bir retten mergendigimen kózge tústi. «Lokomotıvten» taǵy da S.Romashov qos goldyń avtory atansa, Alekseı Badanın bir dop engizdi.
Qorytyndy esep – 10:4, «Aqjaıyqtyń» paıdasynda.
Budan buryn sýperlıgada da óner kórsetip, ótken jyly «Aqjaıyqqa» qosylǵan Maksım Pahomov osy maýsymda qarsylastar qaqpasyna 73 dop soǵyp, úzdik kórsetkishke qol jetkizdi.
Osylaısha ekinshi topta 58 upaı jınaǵan Nıkolaı Shavaldınniń shákirtteri fınaldyq saıystarǵa beriletin eki joldamanyń birin ıelenýge jaqyn tur. 56 upaımen ekinshi orynda turǵan «Znamıa-Ýdmýrtııa» búgin sońǵy básekesinde «Dınamo-Qazan-2» komandasyn jeńse, «Aqjaıyqty» basyp oza alady. Oǵan qosa «Kırovets» (Ýfa, 52 upaı) komandasy da joldamadan úmitti. Ol áli úsh oıyn ótkizedi. Al «Maıak» (Krasnotýrınsk) búgin Pervoýralskide «SKA-Sverdlovsk» komandasynan 2:5 esebimen jeńilis taýyp, 54 upaımen joldamadan tys qaldy.
Joǵary lıgada úsh top bolsa, sonyń árqaısysynan qos úzdik komanda fınaldyq týrnırge qatysady.
«Aqjaıyq» sport klýbynyń dırektory Mereı Qanıbetovtyń aıtýynsha, barlyǵy alty komanda sýperlıgaǵa beriletin jalǵyz joldamany sarapqa salady.
Fınaldyq saıystyń ótetin orny keıin anyqtalady.
1976 jyly kásibı klýb retinde qurylǵan «Aqjaıyq» buǵan deıin óz tarıhynda tórt dúrkin fınaldyq saıystardyń qola júldegeri atanǵan edi.
Eske sala keteıik, budan buryn «Aqjaıyqtyń» óz tobynda kósh basyna kóterilgenin jazǵan bolatynbyz.
