Dopty hokkeı: «Aqjaıyq» «SKA-Sverdlovsk» komandasyn ekinshi márte jeńdi
ORAL. QazAqparat - Búgin dopty hokkeıden Oraldyń «Aqjaıyǵy» «Stenovık» stadıonynda «SKA-Sverdlovsk» (Ekaterınbýrg) komandasymen ekinshi oıynyn ótkizdi, dep habarlaıdy «QazAqparat» tilshisi.
Dopty hokkeıden joǵary lıga komandalary arasynda búkilreseılik jarysta óner kórsetip júrgen qos komanda arasyndaǵy bul kezdesý de tartysty ótti. Aldymen 24-mınýtta qonaqtardan Evgenıı Bykov mergendik tanytyp, esep ashty.
Ekinshi taımda aıdyn ıeleri qarymta qaıyrdy. Aldymen 59-mınýtta reseılik legıoner Sergeı Panteev tarazy basyn teńestirdi. Al 60-mınýtta Andreı Gýşın jeńis golyn soqty. Osylaısha, «Aqjaıyq» eki mınýttyń ishinde oıyn taǵdyryn sheshti.
Reseılik maman Vladımır Kojevnıkov jattyqtyratyn oraldyqtar keshe qarsylas komandany 4:2 esebimen tize búktirgen bolatyn.
Qos jeńisten keıin «Aqjaıyq» ekinshi topta 17 upaı jınap, «Lokomotıv» (Orynbor) komandasymen úshinshi-tórtinshi oryndardy bólisýde.
Batysqazaqstandyqtar kelesi básekelelerin Oralda 18-19 qańtarda osy topta 27 upaımen ekinshi orynda kele jatqan «Maıak» (Krasnotýrınsk) komandasymen ótkizedi. Bir qyzyǵy, «Maıak» komandasyn Oral dopty hokkeıiniń túlegi, KSRO chempıony, kezinde Qazaqstan quramasynda oınaǵan Oleg Chernov jattyqtyrady.
