DOPTY HOKKEI: «Aqjaıyq» «SKA-Sverdlovsk» komandasymen ekinshi oıynda da jeńiske jetti
ASTANA. QazAqparat - 21 jeltoqsan kúni dopty hokkeıden Reseı chempıonaty joǵary lıgasy ekinshi tobynda óner kórsetetin Oraldyń «Aqjaıyǵy» Ekaterınbýrgtiń «SKA-Sverdlovsk» komandasymen qarymta kezdesýin ótkizdi.
Bul oıynda da oraldyqtar basymdylyq kórsetip, 3:0 esebimen jeńiske jetti. Sergeı Bashaev qos doptyń avtory atansa, komanda kapıtany Eskendir Nuǵmanov kezdesý núktesin qoıdy. 20 jeltoqsan kúngi matchta da Sergeı men Eskendir qarsylastar qaqpasyna qos-qostan gol engizgen bolatyn. Sóıtip, óz aıdynyndaǵy tórt oıynyn da utqan «Aqjaıyq» 16 upaımen óz tobynda besinshi orynǵa kóterildi. Dmıtrıı Ivannıkovtiń shákirtteri kelesi kezdesýlerin 27-28 jeltoqsanda óz aıdynynda 18 upaımen úshinshi orynda kele jatqan Orynbordyń «Lokomotıvimen» ótkizedi.
