Dopty hokkeı: «Aqjaıyq» reseılik komandany taǵy da utty
ORAL. QazAqparat - Dopty hokkeıden joǵary lıga komandalary arasynda búkilreseılik jarysta «Aqjaıyq» «SKSO SKA-Sverdlovsk» komandasymen ekinshi kezdesýin ótkizdi, dep habarlaıdy QazAqparat tilshisi.
«Jastar» stadıonynda ótken match, birinshi oıynǵa qaraǵanda, áldeqaıda tartysty boldy.
«Aqjaıyqtyń» jas shabýylshysy Azat Bekturǵan birinshi mınýtta-aq esep ashty. 21-mınýtta reseılik legıoner Sergeı Panteev mergendik tanytyp, 2:0-ge jetkizdi. Degenmen 42-mınýtta meımandardan Alekseı Borısov esepti qysqartty.
Ekinshi taımda 56-mınýtta komanda kapıtany Maksım Ótebalıev aıyrmashylyqty qalpyna keltirgenimen, úsh mınýttan keıin Mıhaıl Kalıstratov, 63-mınýtta Nıkıta Nelep gol soǵyp, tarazy basyn teńestirdi - 3:3. Budan keıin reseılik Maksım Pahomovtyń qos dobyna sverdlovskilik hokkeıshiler (Denıs Bagaev) bir ǵana golmen jaýap qaıyra aldy.
Osylaısha asa tartysty ótken matchta «Aqjaıyq» 5:4 esebimen jeńiske jetti. Bul oıynnan keıin 24 upaımen oraldyqtar ekinshi topta burynǵysha besinshi orynda keledi.
Nıkolaı Shavaldınniń shákirtteri kelesi kezdesýlerin «Jastar» stadıonynda týrnır kestesinde 36 upaımen ekinshi orynda kele jatqan «Maıak» (Krasnotýrınsk) komandasymen ótkizedi. Bul topta «Znamıa-Ýdmýrtııa» (Votkınsk) komandasy 41 upaımen kósh basynda tur.
«Aqjaıyq» sport klýby dırektorynyń mindetin atqarýshy Armat Meńdeshevtiń aıtýynsha, Reseıdiń joǵary lıgasynda úsh top bolsa, sonyń árqaısysynan úzdik eki komanda fınaldyq saıystarǵa joldama alady. Sodan keıin sýperlıgaǵa shyǵý úshin kúsh synasady. Ekinshi topta «Znamıa-Ýdmýrtııa» men «Maıak» komandalary ózgelerden oq boıy ozyp ketkendikten, batysqazaqstandyq klýb bıyl da fınaldyq saıystardan tys qalyp otyr deýge bolady.
Eske sala keteıik, budan buryn «Aqjaıyqtyń» reseılik komandany iri eseppen tize búktirgenin jazǵan bolatynbyz.
