Dopty hokkeı: «Aqjaıyq» reseılik komandany iri eseppen jeńdi
ORAL. QazAqparat - Dopty hokkeıden joǵary lıga komandalary arasyndaǵy búkilreseılik jarysta «Aqjaıyq» Ekaterınbýrgtyń «SKSO SKA-Sverdlovsk» komandasymen kezdesti, dep habarlaıdy QazAqparat tilshisi.
«Jastar» stadıonyndaǵy match aıdyn ıeleriniń basymdyǵymen ótti. Birinshi taımnyń 20-shy mınýtynda qonaqtardan Nıkıta Ivlev esep ashty. Degenmen, odan keıin «Aqjaıyqtyń» kapıtany Maksım Ótebalıev, Andreı Gýşın jáne reseılik legıoner Maksım Pahomov kózge túsip, esepti 3:1-ge jetkizdi.
Ekinshi taımda Pavel Chebakov, taǵy bir reseılik Sergeı Panteev jáne M.Pahomovtyń soqqan goldaryna meımandardan Alekseı Snegırev jaýap qaıyra aldy. Osylaısha Nıkolaı Shavaldınniń shákirtteri 6:2 esebimen jeńiske jetti. Bul oıynnan keıin 21 upaı jınaǵan oraldyqtar ekinshi topta qaıtadan besinshi orynǵa kóterildi. Erteń qos komanda ekinshi kezdesýin ótkizedi.
Eske sala keteıik, budan buryn «Aqjaıyqtyń» qalǵan oıyndaryn óz aıdynynda ótkizetinin jazǵan bolatynbyz.
