Dopty hokkeı: «Aqjaıyq» óz tobynda kósh basyna kóterildi
ORAL. QazAqparat – Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» Orynborda «Lokomotıvpen» kezekti oıynyn ótkizdi, dep habarlaıdy QazAqparat tilshisi.
Reseı dopty hokkeı federatsııasynan alynǵan málimetke qaraǵanda, batysqazaqstandyq klýb 7:1 esebimen jeńiske jetti.
Birinshi taımda «Aqjaıyqtan» Artem Lapshın esep ashsa, Sergeı Bashaev 2:0-ge jetkizdi. Sodan keıin komanda surmergeni, taǵy bir reseılik legıoner Maksım Pahomov qarsylastyń qaqpasyna qos gol engizdi – 4:0. Budan keıin «Aqjaıyqtyń» qaqpashysy Vıacheslav Gorchakov Alekseı Petrov soqqan 12 metrlik aıyp dobyn qaıtardy.
Oıynnyń ekinshi kezeńinde sol A.Petrov gol salǵanymen, S.Bashaev (eki ret), M.Pahomov esepti ulǵaıta tústi – 7:1.
Osylaısha bul matchtan keıin 55 upaı jınaǵan Nıkolaı Shavaldınniń shákirtteri ekinshi topta birinshi orynǵa kóterildi. Buǵan deıin 54 upaımen kósh bastap kele jatqan «Maıak» (Krasnotýrınsk) komandasy Pervoýralskide «SKA-Sverdlovsk» klýbynan 1:8 esebimen utylyp qaldy. Úshinshi oryndaǵy «Znamıa-Ýdmýrtııa» (53 upaı) búgin Votkınskide «Dınamo-Qazan-2» (Qazan) komandasyn qabyldaıdy. «Znamıa-Ýdmýrtııa» kósh sońynda kele jatqan klýbty tize búktirse, birinshi orynǵa shyǵady.
Endi «Aqjaıyqqa» fınaldyq saıystarda beriletin eki joldamanyń birin ıelený úshin erteń Orynborda «Lokomotıvpen» bolatyn ekinshi matchty utsa, jetkilikti. Al úsh toptyń úzdikteri qatysatyn fınaldyq týrnırde Reseı sýperlıgasynyń joldamasy sarapqa salynady.
Eske sala keteıik, budan buryn «Aqjaıyqtyń» óz aıdynyndaǵy sońǵy kezdesýin de jeńispen aıaqtaǵanyn jazǵan bolatynbyz.
