Dopty hokkeı: «Aqjaıyq» óz tobynda birinshi orynǵa kóterildi
ORAL. QazAqparat - Dopty hokkeıden Reseı chempıonaty joǵary lıgasynyń ekinshi tobynda oınaıtyn Oraldyń «Aqjaıyǵy» bıylǵy maýsymdaǵy óz aıdynynda ótkizgen sońǵy kezdesýinde de «Znamıa-Ýdmýrtııa» (Votkınsk) komandasyn tize búktirdi, dep habarlaıdy «QazAqparat» HAA tilshisi.
Bul oıynda «Aqjaıyqtyń» surmergeni, reseılik shabýylshy Sergeı Bashaev bes goldyń avtory atandy. Buǵan qonaqtar eki-aq golmen jaýap qaıyrdy. Sóıtip reseılik maman Vladımır Kojevnıkov jattyqtyratyn oraldyqtar 5:2 esebimen jeńiske jetti.
Osy matchtan keıin 49 upaı jınaǵan «Aqjaıyq» óz tobynda birinshi orynǵa kóterildi. 47 upaımen ekinshi orynda turǵan «Maıaktyń»(Krasnotýrınsk) Votkınskidegi «Znamıa-Ýdmýrtııa» komandasymen bir kezdesýi krasnotýrınskilik hokkeıshilerdiń aýyryp qalýyna baılanysty ótpeı qalǵan bolatyn. «Aqjaıyq» sport klýbynyń dırektory Azamat Shaıhynyń aıtýynsha, sondyqtan «Maıak» komandasyna jeńilis jazylady.
Sol sebepti oraldyqtar óz tobynda jeńimpaz atanatyn bolady. Endi olar Syktyvkar qalasynda 28 aqpan - 6 naýryz aralyǵynda ótetin fınaldyq oıyndarǵa attanady. Fınaldyq týrnırde «Stroıtel» (Syktyvkar),«Mýrman» (Mýrmansk), «Aqjaıyq», «Maıak», «Znamıa-Ýdmýrtııa», «Saıany» (Abakan),«Enıseı-2» (Krasnoıarsk) komandalary sýperlıgaǵa beriletin qos joldamany sarapqa salady.
