Dopty hokkeı: «Aqjaıyq» óz aıdynyndaǵy sońǵy kezdesýin de jeńispen aıaqtady
ORAL. QazAqparat – Dopty hokkeıden joǵary lıga komandalary arasynda búkilreseılik jarysta «Aqjaıyq» «Maıak» (Krasnotýrınsk) komandasymen ekinshi oıynyn ótkizdi, dep habarlaıdy QazAqparat tilshisi.
Bul oraldyqtardyń «Jastar» stadıonyndaǵy osy maýsymdaǵy sońǵy kezdesýi edi.
Tartysty órbigen birinshi taımda esep ashylǵan joq.
Matchtyń ekinshi kezeńinde aıdyn ıeleri basymdylyq tanytty. Aldymen «Aqjaıyqtyń» surmergeni Maksım Pahomov qarsylastyń qaqpasyna qos dopty engizse, qonaqtardan Dmıtrıı Lıpın esepti qysqartty. Degenmen budan keıin M.Pahomov taǵy da eki gol soqsa, Aleksandr Shtele de qur ketken joq. M.Pahomov bıylǵy maýsymdaǵy gol sanyn 64-ke jetkizdi.
Osylaısha Nıkolaı Shavaldınniń shákirtteri 5:1 esebimen jeńiske jetti. Oraldyqtar óz aıdynyndaǵy básekelerdiń bárin jeńispen aıaqtap, birde-bir upaı joǵaltqan joq.
Qazirgi kezde ekinshi topta kósh basyndaǵy «Maıakta» 54 upaı bolsa, odan keıingi «Znamıa-Ýdmýrtııada» (Votkınsk) 53, «Aqjaıyqta» 52 upaı bar. Joǵary lıgadaǵy fınaldyq saıystarǵa ár toptan úzdik qos komanda joldama alady. Ekinshi topta joldamaǵa kim ıe bolatynyn sońǵy qos oıynnyń nátıjesi sheshedi. 20-21 aqpanda «Aqjaıyq» Orynborda «Lokomotıvpen», «Maıak» Pervoýralskide «SKA-Sverdlovsk» komandasymen aıdynǵa shyǵady. Al «Znamıa-Ýdmýrtııa» Votkınskide «Dınamo-Qazan-2» klýbyn qabyldaıdy.
Eske sala keteıik, budan buryn «Aqjaıyqtyń» kósh bastaýshy komandany utqanyn jazǵan bolatynbyz.
