Dopty hokkeı: «Aqjaıyq» óz aıdynynda «Nıkelşık» komandasyn utty
ORAL. QazAqparat - Búgin dopty hokkeıden Reseı chempıonaty joǵary lıgasynyń ekinshi tobynda oınaıtyn Oraldyń «Aqjaıyǵy» «Stenovık» stadıonynda Verhnıı Ýfaleıdiń «Nıkelşık» komandasyn qabyldap, 6:3 esebimen jeńiske jetti, dep habarlaıdy «QazAqparat» HAA tilshisi.
Bul kezdesýde komandanyń surmergeni, reseılik legıoner Sergeı Bashaev tórt doptyń avtory atansa, Petr Grıbanov qonaqtar qaqpasyna qos birdeı gol soqty.
Erteń qos komanda ekinshi matchyn ótkizedi.
Osy oıynnan keıin 40 upaı jınaǵan «Aqjaıyq» óz tobynda úshinshi orynda keledi. Ár topta aldyńǵy úshtikke ilingen komandalar bıyl Syktyvkar qalasynda 28 aqpan - 6 naýryz aralyǵynda ótetin fınaldyq oıyndarǵa qatysyp, sýperlıga joldamasyn sarapqa salady.
Aıta keteıik, búgin oblys ákimi Altaı Kólginovtiń turǵyndarmen eseptik kezdesýinde dopty hokkeıden Qazaqstan quramasynyń kapıtany, Novosibirdiń «Sıbselmash» komandasynyń namysyn qorǵap júrgen Raýan Isalıevtiń anasy Gúlbara Jumalıeva reseılikter tarapynan Qazaqstannan bir komandany sýperlıgaǵa qosýǵa nıet bar ekendigin aıtyp, «Osynaý sport túrine qoldaý kórsetile me?» dep surady. Buǵan jaýap bergen óńir basshysy dopty, sondaı-aq shaıbaly hokkeıdi de damytýǵa qoldaý kórsetiletinin jetkizdi. Dopty hokkeıden qyryq jyldan astam tarıhy bar «Aqjaıyq» komandasynyń bıylǵy qarqyny jaqsy. Onyń ústine «Jastar» stadıonynda «QPO b.v.» qarjysy esebinen jasandy muz aıdynyn jasaý jumystary júrgizilýde. Sýperlıgaǵa engisi keletin klýbqa qoıylatyn talaptyń biri - stadıonda jasandy muz aıdyny bolýy kerek. Mundaı jaǵdaı jasalsa, dopty hokkeı sheberlerine maýsymǵa kúni buryn daıyndalyp, kóbirek jattyǵýlaryna múmkindik týady. Sol sekildi shaıbaly hokkeıden de ázirge jasóspirimder arasynda bir klýb qurýǵa bolady.
