Dopty hokkeı: «Aqjaıyq» Orynbordyń «Lokomotıvin» taǵy da utty
ORAL. QazAqparat - Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» búgin Orynbordyń «Lokomotıvimen» ekinshi kezdesýin ótkizdi, dep habarlaıdy QazAqparat tilshisi.
«Jastar» stadıonyndaǵy match bul joly óte tartysty órbidi. Birinshi taımda 5-mınýtta «Aqjaıyq» quramyndaǵy reseılik legıoner Sergeı Panteevtiń 12 metrlik aıyp dobyn «Lokomotıvtiń» qaqpashysy Nıkıta Nemytov qaıtara bildi. Degenmen taǵy bir legıoner Maksım Pahomovtyń pasynan keıin 26-mınýtta «Aqjaıyqtyń» kapıtany Maksım Ótebalıev esep ashty. Áıtse de 39-mınýtta «Lokomotıvten» Evgenıı Mehonıshın tarazy basyn teńestirip ketti.
Ekinshi taımda 61-mınýtta Samat Amanshın buryshtamadan dop bergennen keıin M.Pahomov jeńis golyn soqty - 2:1. Bul oıynnan keıin 18 upaı jınaǵan Nıkolaı Shavaldınniń shákirtteri ekinshi topta burynǵysha besinshi orynda keledi.
«Aqjaıyq» hokkeıshileriniń 25 qańtar - 2 aqpan aralyǵynda Shvetsııanyń Venersborg qalasynda ótetin álem chempıonatyna qatysýyna baılanysty oraldyqtar úshin birinshilikte biraz úzilis bolady. Endi olar aldaǵy kezdesýlerin 4-5 aqpanda Qazanda «Dınamo-Qazan-2» komandasymen ótkizedi.
Eske sala keteıik, budan buryn batysqazaqstandyq klýbtyń «Lokomotıvti» tas-talqan etip utqanyn jazǵan bolatynbyz.
