Dopty hokkeı: «Aqjaıyq» Orynbordaǵy ekinshi kezdesýinde de ese jiberdi
ORAL. QazAqparat - Dopty hokkeıden joǵary lıga komandalary arasynda búkilreseılik jarysta «Aqjaıyq» Orynborda búgin jergilikti «Lokomotıvpen» ekinshi kezdesýin ótkizdi, dep habarlaıdy QazAqparat tilshisi.
Ekinshi topta oınaıtyn komandalar arasyndaǵy bul báseke de tartysty órbidi.
Birinshi taımnyń bel ortasynan asa bere, aıdyn ıelerinen Egor Lobaev esep ashty. Kóp uzamaı «Lokomotıvtiń» kapıtany Dmıtrıı Barlıaev «Aqjaıyqtyń» qaqpasyna belgilengen 12 metrlik aıyp dobyn dál oryndady - 2:0. Degenmen Samat Amanshınniń pasynan keıin oraldyqtar quramyndaǵy reseılik legıoner Sergeı Panteev esepti qysqarta aldy.
Ekinshi taımda «Lokomotıvten» Igor Ivanov esepti 3:1-ge jetkizdi. Alaıda «Aqjaıyq» ta qarap qalmaı, áýeli Andreı Gýşın, sodan keıin S.Panteev (pas bergen S.Amanshın) gol soǵyp, tarazy basyn teńestirdi. Sosyn S.Amanshınniń ózi (pas bergen Petr Grıbanov) mergendik tanytyp, komandasyn alǵa shyǵardy.
Match sońyna taman orynborlyq tóreshiler qonaqtardyń qaqpasyna taǵy bir aıyp dobyn belgiledi, odan D.Barlıaev múlt ketken joq - 4:4. Sodan keıin «Lokomotıvten» Andreı Ýskov jeńis golyn soqty - 5:4.
Nıkolaı Shavaldın jattyqtyratyn «Aqjaıyq» 18-19 qańtarda Oraldaǵy «Jastar» stadıonynda dál osy «Lokomotıvti» qabyldaıdy. Demek, óz aıdynynda qarymta qaıtarýǵa tolyq múmkindik bar.
Eske sala keteıik, budan buryn «Aqjaıyqtyń» jańa jyldaǵy alǵashqy kezdesýinde jeńilip qalǵanyn jazǵan bolatynbyz.
