Dopty hokkeı: «Aqjaıyq» «Lokomotıv» komandasymen teń oınady
ORAL. QazAqparat - Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» kezekti oıynyn Orynbordyń «Lokomotıv» komandasymen ótkizdi, dep habarlaıdy «QazAqparat» tilshisi.
Oraldaǵy «Stenovık» stadıonynda ótken kezdesýdiń birinshi taımynan keıin reseılik maman Vladımır Kojevnıkovtiń shákirtteri 2:1 esebimen alda turdy. Áıtse de ekinshi taımda sol basymdylyqty saqtaı almaı, komandalar 3:3 esebimen teń tarqasty. «Aqjaıyqtan» reseılik legıoner Sergeı Panteev qos goldyń avtory atansa, sondaı-aq Bolat Muhıt mergendigimen kózge tústi.
10 qańtar kúni qos klýb ekinshi márte aıdynǵa shyǵady.
Ekinshi topta 9 oıynnan keıin 8 upaı jınaǵan oraldyqtar ázirge sońǵy orynda keledi.
Aıta keteıik, bıyl dopty hokkeıden álem chempıonaty 29 qańtar - 4 aqpan aralyǵynda Reseıdiń Habarovsk qalasynda ótedi. «Aqjaıyq» sport klýbynyń dırektory Azamat Shaıhynyń sózine qaraǵanda, oraldyq komandadan ulttyq quramaǵa kimderdiń alynatyny keıin belgili bolmaq.
