Dopty hokkeı: «Aqjaıyq» kósh bastaýshy komandamen teń oınady
ORAL. QazAqparat - Búgin dopty hokkeıden joǵary lıga komandalary arasynda búkilreseılik jarysta «Aqjaıyq» «Znamıa-Ýdmýrtııa» (Votkınsk) komandasyn qabyldady, dep habarlaıdy «QazAqparat» tilshisi.
Bul oıyn óte tartysty ótti. Onyń ústine «Znamıa-Ýdmýrtııa» komandasy ekinshi topta kósh bastap kele jatqandyqtan, Oralda upaı joǵaltqysy kelgen joq. Degenmen reseılik maman Vladımır Kojevnıkov jattyqtyratyn «Aqjaıyq» babyna kele bastaǵanyn kórsetti. Birinshi taımnan keıin 1:3 esebimen jeńilip jatqan oraldyqtar oıynnyń ekinshi bóliginde sheberlikterin tanyta bildi. Sóıtip 3:3 esebimen aıaqtalǵan kezdesýde oraldyqtardan Elaman Álipqalıev qos goldyń avtory atansa, Bolat Muhıt qarsylastar qaqpasyna taǵy bir dopty engizdi. Qonaqtardan Mıhaıl Razýmovskıı esep ashsa, sodan keıin Roman Frolov eki márte mergendigimen kózge tústi
«Aqjaıyq» sport klýbynyń dırektory Azamat Shaıhynyń aıtýynsha, «Znamıa-Ýdmýrtııa» komandasy bıyl kúshti oıynshylardy jınap aldy. Olardyń ishinde sýperlıgada oınaǵan tájirıbeli hokkeıshiler de jeterlik. Sondyqtan batysqazaqstandyqtardyń olarmen terezesi teń dárejede óner kórsetýin tabysqa balaýǵa bolady.
Erteń qos klýb ekinshi kezdesýin ótkizedi.
Aıta keteıik, «Aqjaıyq» jeti upaımen ekinshi topta burynǵysynsha sońǵy orynda keledi.
