Dopty hokkeı: «Aqjaıyq» kezekti jeńisine qol jetkizdi
ORAL. QazAqparat – Dopty hokkeıden joǵary lıga komandalary arasynda búkilreseılik jarysta «Aqjaıyq» kezekti jeńisine qol jetkizdi, dep habarlaıdy QazAqparat tilshisi.
«Jastar» stadıonynda Orynbordyń «Lokomotıv» komandasymen ótken ekinshi oıyn da «Aqjaıyqtyń» paıdasyna sheshildi.
Oraldyq maman Nıkolaı Shavaldınniń shákirtteri óz basymdylyqtaryn golǵa aınaldyra bildi. Oıynnyń birinshi kezeńinde Petr Grıbanov, Sergeı Bashaev jáne Maksım Pahomov eki márte mergendigimen kózge túsip, esepti 4:0-ge jetkizdi. Buǵan «Lokomotıvten» Alekseı Badanın bir golmen jaýap qaıyrdy.
Ekinshi taımda qonaqtar (Sergeı Romashov) taǵy bir gol soǵyp, esepti qysqartqandaı bolǵan. Degenmen Qýanysh Temirálın «Lokomotıvtiń» qaqpasyna jekedara shyǵyp, óz múmkindigin múlt jibermedi – 5:2. Budan keıin «Aqjaıyqtyń» surmergeni Mıhaıl Pahomov 12 metrlik penaltıdi dál oryndady. «Lokomotıvten» S.Badanın ekinshi golyn soqqanymen, P.Grıbanov match núktesin qoıdy – 7:3.
Bul kezdesýden keıin 22 upaı jınaǵan oraldyqtar ekinshi topta úshinshi orynda keledi. Kósh basyndaǵy «Maıaktyń» (Krasnotýrınsk) 36, ekinshi oryndaǵy «Znamıa-Ýdmýrtııanyń» (Votkınsk) 27 upaıy bar. Reseıdiń joǵary lıgasynda úsh top bar. Ár toptan úzdik eki komanda fınaldyq saıystarǵa joldama alady.
«Aqjaıyq» kelesi oıyndaryn syrt aıdynda ótkizedi. 13-14 qańtarda Qazanda «Dınamo-Qazan-2» komandasymen oınaıdy. Bul klýbtan upaı oljalaýǵa tolyq múmkindik bar. Sodan keıin 17-18 qańtarda Votkınskide «Znamıa-Ýdmýrtııa» komandasymen kúsh synasady.
Eske sala keteıik, budan buryn «Aqjaıyqtyń» orynborlyq komandany oısyrata utqanyn jazǵan bolatynbyz.
