Dopty hokkeı: «Aqjaıyq» kezekti oıynda jeńilip qaldy
ORAL. QazAqparat – Dopty hokkeıden joǵary lıga komandalary arasyndaǵy búkilreseılik jarysta Oraldyń «Aqjaıyǵy» kezekti oıynyn Verhnıı Ýfaleıde jergilikti «Nıkelşıkpen» ótkizdi, dep habarlaıdy QazAqparat tilshisi.
«Nıkelşık» bıylǵy maýsymdaǵy óz aıdynyndaǵy alǵashqy kezdesýin qarqyndy bastady.
Aldymen German Algın reseılik tóreshi belgilegen 12 metrlik aıyp dobyn sátti oryndasa, Dmıtrıı Shadrın esepti 2:0-ge jetkizdi.
Oral dopty hokkeıiniń túlegi Nurbol Bókeshov esepti qysqartqanymen, Sergeı Elfımov qaıta uzartty – 3:1. «Aqjaıyq» sapyndaǵy reseılik Sergeı Bashaev mergendigimen kózge túskenimen, G.Algın penaltıden múlt ketken joq – 4:2.
Ekinshi taım da alma-kezek shabýylmen ótti. 63-mınýtta buryshtamadan berilgen doptan keıin Anton Ponomarev, sálden keıin Evgenıı Mehonoshın qonaqtar qaqpasyn dál kózdedi – 6:2. Budan soń «Aqjaıyqtyń» surmergeni Maksım Pahomovtyń soqqan golyna aıdyn ıelerinen Anton Oppenlender jaýap berdi – 7:3. Oraldyqtardan S.Bashaev oıyndaǵy sońǵy goldy engizdi – 4:7.
Osylaısha Nıkolaı Shavaldınniń shákirtteri jańa maýsymda ekinshi ret jeńilis tapty.
Erteń qos komanda qarymta kezdesýin ótkizedi.
Eske sala keteıik, budan buryn «Aqjaıyqtyń» qarsylasyn iri eseppen utqanyn jazǵan bolatynbyz.
