Dopty hokkeı: «Aqjaıyq» Qazannan kelgen qarsylasyn oısyrata utty
ORAL. QazAqparat – Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» óz aıdynynda «Dınamo-Qazan-2» klýbyn oısyrata utty, dep habarlaıdy QazAqparat tilshisi.
Bul - Nıkolaı Shavaldın shákirtteriniń 2019-2020 jylǵy maýsymdaǵy «Jastar» stadıonyndaǵy alǵashqy kezdesýi edi.
«Aqjaıyq» sapyndaǵy reseılik legıoner Maksım Pahomov erekshe kózge túsip, tórt goldyń avtory atandy. Taǵy bir reseılik Aleksandr Shtele men Petr Grıbanov qarsylastar qaqpasyna qos-qostan dop engizdi. 85-mınýtta Ershat Amangeldıev matchtyń núktesin qoıdy. Qorytyndy esep – 9:0. Samat Amanshın de áriptesterine úsh márte nátıjeli pas shyǵaryp berdi.
Erteń komandalar ekinshi kezdesýin ótkizedi.
Osy básekeden keıin 7 upaı jınaǵan oraldyqtar ekinshi topta qazandyqtardy basyp ozyp, altynshy orynǵa kóterildi.
Eske sala keteıik, budan buryn dopty hokkeıden Qazaqstan jastar quramasynyń álem chempıonatynda baq synaǵanyn jazǵan bolatynbyz.
