Dopty hokkeı: «Aqjaıyq» qazandyq komandany taǵy da iri eseppen utty
ORAL. QazAqparat – Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» «Dınamo-Qazan-2» klýbyn taǵy da iri eseppen utty, dep habarlaıdy QazAqparat tilshisi.
«Jastar» stadıonynda oraldyqtar qarsylasyn birden tyqsyryp tastady.
Nıkolaı Shavaldınniń shákirtteri birinshi taımda-aq esepti 6:0-ge jetkizip, báseke taǵdyryn sheshti deýge bolady. Komandanyń surmergeni, reseılik legıoner Maksım Pahomov het-trık jasasa, kórshi eldiń taǵy bir ókili Sergeı Bashaev qos goldyń avtory atandy. Oraldyq dopty hokkeı túlegi Petr Grıbanov ta óz esebine bir goldy jazdy.
Oıynnyń ekinshi kezeńinde qonaqtar qarymta qaıtarýǵa tyrysyp baqty. Qazandyqtardan Vladıslav Veselov eki dop soqsa, oraldyqtardan Ershat Amangeldıev pen Samat Amanshın jaýap qaıyrdy.
Osylaısha «Aqjaıyq» 8:2 esebimen jeńiske jetti.
Oraldyqtar 28-29 jeltoqsanda ekinshi topta 27 upaı jınap, «Maıakpen» (Krasnotýrınsk) birge kósh bastap kele jatqan «Znamıa-Ýdmýrtııany» (Votkınsk) qabyldaıdy. Batysqazaqstandyq komanda 10 upaımen altynshy orynda tur.
Eske sala keteıik, budan buryn «Aqjaıyqtyń» Qazannan kelgen qarsylasyn oısyrata utqanyn jazǵan bolatynbyz.
