Dopty hokkeı: «Aqjaıyq» Qazanda tartysty oıynda ese jiberdi
ORAL. QazAqparat - Dopty hokkeıden joǵary lıga komandalary arasyndaǵy búkilreseılik jarysta Oraldyń «Aqjaıyǵy» Qazanda «Dınamo-Qazan-2» komandasymen kezdesti, dep habarlaıdy QazAqparat tilshisi.
Shvetsııada senbi kúni márege jetken álem chempıonatynan oralǵan oraldyq bendı sheberlerine bul match ońaıǵa túsken joq.
Aıdyn ıelerinen aldymen Anton Býbnov kózge tússe, Ramıl Ibragımov esepti 3:0-ge jetkizdi. Tek osydan keıin ǵana «Aqjaıyq» quramyndaǵy reseılik legıoner Maksım Pahomov 12 metrlik aıyp dobyn dál oryndap, esepti qysqartty. Degenmen R.Ibragımov taǵy bir goldyń avtory atandy - 4:1. «Aqjaıyqtyń» kapıtany Maksım Ótebalıev Pavel Chebakovtyń pasynan keıin qaqpadan sańylaý taba aldy.
Tartysty oıyn ekinshi taımda da qyza tústi. Qazandyqtardan R.Ibragımov taǵy qos doptyń avtory atandy. Muny eki gol soqqan Dmıtrıı Vahrýshev jalǵastyrsa, Aırat Haımýrzın de «Aqjaıyq» qaqpasyn dál kózdedi. Oraldyqtardan M.Ótebalıev úsh, P.Chebakov, M.Pahomov, Qýanysh Temirálın bir-bir goldan soqqanymen, qazandyqtar jetkizbedi.
Osylaısha «Dınamo-Qazan-2» komandasy asa tartysty oıynda 9:8 esebimen jeńiske jetti. Buǵan jergilikti tóreshilerdiń qonaqtarǵa ereje buzdy dep, aıyp ýaqytyn kóbirek belgileýi de septesti dep aıtýǵa bolady.
Oraldyq bapker Nıkolaı Shavaldınniń shákirtteri 18 upaımen ekinshi topta besinshi orynda keledi.
Qos komanda erteń ekinshi oıynyn ótkizedi.
Eske sala keteıik, budan buryn negizinen «Aqjaıyq» hokkeıshilerinen quralǵan Qazaqstan quramasynyń álem chempıonatynda tórtinshi orynǵa taban tiregenin jazǵan bolatynbyz.
