Dopty hokkeı: «Aqjaıyq» Qazanda taǵy da utylyp qaldy
ORAL. QazAqparat - Dopty hokkeıden joǵary lıga komandalary arasyndaǵy búkilreseılik jarysta Oraldyń «Aqjaıyǵy» Qazanda «Dınamo-Qazan-2» komandasymen ekinshi matchyn ótkizdi, dep habarlaıdy QazAqparat tilshisi.
Nıkolaı Shavaldın jattyqtyratyn oraldyq klýb ekinshi topta 18 upaımen besinshi orynda tursa, qazandyqtar (14 upaı) odan bir saty tómende edi.
Bul joly da oıyn tartysty órbip, kóp uzamaı jergilikti tóreshiler «dopty ruqsat etilmegen ádispen toqtatty» degen sebeppen Ilıa Glýhovty 10 mınýtqa aıdynnan shettetti. Osyny paıdalanǵan qazandyq Ramıl Ibragımov esep ashty. Oǵan «Aqjaıyq» sapyndaǵy reseılik legıoner Maksım Pahomov jaýap qaıyrǵanymen, Dmıtrıı Vahrýshev eki márte mergendik tanytyp, esepti 3:1-ge jetkizdi. Degenmen M.Pahomov «Dınamo-Qazan-2» qaqpasynan taǵy eki ret sańylaý taýyp, tarazy basyn teńestirdi - 3:3.
Ekinshi taımda Bolat Muhıt pen Aleksandr Podmetalın aıdynnan qýylǵannan keıin R.Ibragımov 12 metrlik aıyp dobyn dál oryndasa, Dmıtrıı Mýnıtsyn esepti 5:3-ke jetkizdi. Budan keıin M.Pahomov qazandyqtardyń qaqpasyna belgilengen 12 metrlik aıyp dobyn soǵa almady. Match sońynda M.Bolat ta 12 metrlik penaltıden múlt ketti.
Osylaısha aıdyn ıeleri 5:3 esebimen jeńiske jetti.
Oraldyqtar kelesi kezdesýlerin Votkınskide 8-9 aqpan kúnderi osy ekinshi topta kósh bastap kele jatqan «Znamıa-Ýdmýrtııa» komandasymen ótkizedi.
Eske sala keteıik, budan buryn «Aqjaıyqtyń» tartysty kezdesýde qazandyqtarǵa ese jibergenin jazǵan bolatynbyz.
