Dopty hokkeı: «Aqjaıyq» Qazanda qarymta qaıtardy
ORAL. QazAqparat - Dopty hokkeıden Reseı chempıonaty joǵary lıgasynda óner kórsetetin Oraldyń «Aqjaıyǵy» búgin Qazan qalasynda «Dınamo-Qazan-2» komandasymen ekinshi kezdesýinde 6:4 esebimen jeńiske jetti, dep habarlaıdy «QazAqparat» HAA tilshisi.
Reseı dopty hokkeı federatsııasynyń saıtynan alynǵan málimetke qaraǵanda, tartysty ótken match barysynda oraldyqtar (Sergeı Bashaev) alǵashqy bolyp esep ashty. Keıin qazandyqtardan Roman Frolov 12 metrlik aıyp dobyn dál oryndap, tarazy basyn teńestirdi. S.Bashaev «Aqjaıyqty» taǵy da alǵa shyǵarǵanymen, aıdyn ıeleri (Aleksandr Semenov) qaıta gol soqty. Budan keıin oraldyqtardyń kapıtany Maksım Ótebalıev mergendik tanytty. Biraq tóreshi qonaqtardyń qaqpasyna taǵy bir 12 metrlik aıyp dobyn belgiledi, odan A.Semenov múlt ketken joq. Osydan soń R.Frolov «Dınamony» alǵa shyǵarǵanymen, oraldyqtardan reseılik qorǵaýshy Artem Nedostýpov qaıta teńestirdi. Birinshi taım osylaısha 4:4 bolyp aıaqtaldy.
Ekinshi taımnyń basynda «Aqjaıyqtyń» surmergeni S.Bashaev soqqan qos goldan keıin qarsylastar qanshama tyrysqanmen, esep ózgergen joq.
Qazirgi kezde reseılik maman Vladımır Kojevnıkov baptaıtyn oraldyqtardyń qorjynynda 20 oıynnan keıin 37 upaı bar. Sóıtip olar ekinshi topta tórtinshi orynda kele jatqan Orynbordyń «Lokomotıvinen» (18 oıyn, 25 upaı) biraz qashyqtaı tústi. Eger «Aqjaıyq» qalǵan kezdesýlerin sátti ótkizip, alǵashqy úshtikke ense, sýperlıgaǵa joldama beretin fınaldyq saıystarǵa qatysady. Buǵan tolyq múmkindik bar. Sebebi batysqazaqstandyqtar qalǵan tórt oıynyn da óz aıdynynda ótkizedi, ıaǵnı 17-18 aqpanda «Nıkelşık» (Verhnıı Ýfaleı), 21-22 aqpanda týrnır kestesinde ekinshi satyda turǵan «Znamıa-Ýdmýrtııa» (Votkınsk) komandasyn qabyldaıdy.
Eske sala keteıik, keshe «Aqjaıyq» «Dınamo-Qazan-2» komandasynan 1:6 esebimen utylyp qalǵan bolatyn.
